Jıynǵa Parlament Senatynyń spıkeri Qasym-Jomart Toqaev, Mádenıet jáne sport mınıstri Arystanbek Muhamedıuly, memleket jáne qoǵam qaıratkeri Myrzataı Joldasbekov, Ábish Kekilbaıulynyń jubaıy Klara Jumabaıqyzy, zııaly qaýym ókilderi, aqyn-jazýshylar qatysty.
Aıtýly sharada alǵashqy bolyp sóz alǵan Qasym-Jomart Kemeluly ult rýhanııatyna ólsheýsiz úles qosqan Ábish Kekilbaıulynyń esimi qandaı qurmetke de laıyq ekenin aıtty. «Kósemsóz sheberiniń shyǵarmashylyǵy boıynsha tereń zertteýler júrgizý – keleshek býyn ǵalymdarynyń aldyndaǵy mańyzdy mindet bolýy tıis. Sebebi Ábish Kekilbaıulynyń oılary, fılosofııasy jáne jalpy rýhanı álemi muhıttaı tereń. Ábish Kekilbaıulynyń ádebı álemi sheksiz dúnıe, kópqyrly, maǵynaly mura. Biliminiń kókjıegi sheksiz, biregeı tulǵa, ári jazýshy, ári ádebıettanýshy, ǵalym, tarıhshy, oıshyl, fılosof qana emes, memleketimizdiń damýyna eleýli eńbek sińirgen kórnekti memleket qaıratkeri. Bul – uly jazýshylardyń arasynda óte sırek kezdesetin qubylys», – dedi.
Táýelsizdiktiń eleń-alań shaqtarynda Elbasynyń senimdi serigi bolǵan Ábish Kekilbaıulynyń týyndylarynyń ıdeıalary «Rýhanı jańǵyrý» fılosofııasynyń negizderimen úndesip jatqanyna erekshe nazar aýdarǵan Qasym-Jomart Toqaev: «Prezıdenttiń «Uly dalanyń jeti qyry» ıdeologııasy – túptiń túbinde qazaq zııaly qaýymynyń, jalpy halqymyzdyń asyl armanynyń kórinisi. Búginde bútin halqymyz ulttyq ıdeıany jańǵyrtý jolyna bet burdy. Osylaısha, Ábish aǵamyzdyń armany iske asýda. Marjan sózdiń sheberi, gýmanıst-ǵalym, ultjandy saıasatker Ábish Kekilbaevtyń shyǵarmashylyǵyn, onyń jalpy murasyn ósip kele jatqan urpaq arasynda keńinen dáripteý bizdiń birinshi kezektegi maqsatymyz bolýy tıis. Osy baǵytta kekilbaevtaný ádebıettaný ǵylymyndaǵy negizgi pánderdiń biri bolyp qalyptasýy qajet. Biz qoǵam retinde tıisti áreket jasap, bul jumysty baqylaýǵa alýymyz kerek» dep sózin túıindedi.
Táýelsizdikti nyǵaıtý isine Ábish Kekilbaıulymen qatar júrip úles qosqan Májilis depýtaty Qýanysh Sultanov, memleket jáne qoǵam qaıratkeri Myrzataı Joldasbekov jazýshy týraly estelikterin aıtyp, Ábish áleminiń erekshe jarqyraǵan qyrlaryna toqtaldy. «Shyn máninde kekilbaevtaný ǵylymy qalyptasýy kerek. Ábish Kekilbaıuly esimi bolashaq urpaq jadynda máńgi saqtalady. Ábish týraly áli talaı fılmder túsirilip, kitaptar jazylady. «Meniń basymnan baq taısa da, elimniń basynan baq taımasyn» degen kemeńgerdiń ómiri ár qazaqqa úlgi», dedi Myrzataı Joldasbekov.
Is-shara aıasynda Á.Kekilbaıuly turǵan úıdiń qabyrǵasyna eskertkish taqta ornatylyp, jazýshy atyndaǵy jańa oqý zaly tanystyryldy.
Á.Kekilbaıuly kitaphanasy eń baı kitaphanalardyń biri bolyp sanalady. Ábish Kekilbaıuly atyndaǵy oqý zalynyń qory jazýshynyń kitaphana kolleksııasynan iriktelgen jeke kitaphanasynyń katalogy boıynsha mynadaı ádebıetterdi usynady: bul – adamzat tarıhyna arnalǵan mádenıet jáne óner tarıhy týraly basylymdar, álemniń uly tulǵalary týraly kitaptar, Qazaqstannyń aqyndary men jazýshylarynyń kitaptary, albomdar men atlastar, Qazaqstannyń geografııasy men tarıhy jáne Mańǵystaý almanahtary men kóptegen qyzyqty basylymdar.
Kolleksııada barlyǵy 6019 jádiger usynylǵan. Onyń ishinde 5 883-i kitap, CD jáne DVD dıskilerindegi beınefılmder men aýdıo kitaptar 134 dana jáne
2 bıblıografııalyq broshıýra bar.
Qazirgi tańda oqyrmandardyń suranysy boıynsha jazýshynyń «Ańyzdyń aqyry» shyǵarmasy fransýz jáne qytaı tilderine aýdarylyp jatyr.
Ábish Kekilbaıulynyń alapasy zor esimi qazaq halqynyń tarıhynda aıtýly orynǵa ıe. Onyń qajyr-qaıraty, parasat paıymy, qaldyrǵan shyǵarmashylyq murasy áli talaı urpaqtyń rýhanı azyǵy bolady.
Keler jyly týǵanyna seksen jyl tolatyn jazýshynyń mereıtoıy osy sharamen-aq bastalyp ketkendeı. Bir jaǵy Jastar jylymen de tuspa-tus keletini ǵanıbet bolyp tur. Kekilbaıuly murasynan alar taǵylym mol.
Baǵashar TURSYNBAIULY,
«Egemen Qazaqstan»
