Qazirgi kezde daıyndyq jumystary qyzý júrgizilýde. Halyqaralyq konkıshiler odaǵy (ISU) mamandary «Halyq Arena» sport kesheni zamanaýı talaptaryna saı ekenin aıta kele, bul jerde asa joǵary deńgeıdegi jarystardy ótkizýge bolatynyn atap ótti. Úsh kúnge sozylatyn osy básekeler barysynda álemniń 19 memleketinen kelgen 151 sportshy baq synaıdy. Olardyń qatarynda Olımpııa oıyndary men álem chempıonattarynda atoı salǵan sańlaqtar da bar.
Álem kýbogynyń alǵashqy kezeńi 2-4 qarasha aralyǵynda Kanadanyń Kalgarı qalasynda ótken edi. Sol jarysta bizdiń Abzal Ájiǵalıev 500 metrlik qashyqtyqta 40.136 sekýndtyq kórsetkishpen kúmis medaldi moınyna ildi. Jerlesimiz tek Olımpıada chempıony degen dardaı ataǵy bar qytaılyq Vý Daıszınnen (ýaqyty – 39.915) ǵana qalyp qoıdy. Úshinshi oryndy 1 000 metrlik qashyqtyqta Olımpııa oıyndarynyń jeńimpazy atanǵan vengrııalyq Lıý Shaolın Shandor (40.194) enshiledi. Al 1 000 metrlik qashyqtyqta bizdiń Erkebýlan Shamýhanov besinshi orynǵa jaıǵasty. Sol sekildi qyzdar quramasy estafetalyq saıysty besinshi orynmen qorytyndylady.
9-11 qarasha aralyǵynda AQSh-tyń Solt-Leık-Sıtı qalasynda ótken álem kýbogynyń ekinshi kezeńinde qazaqstandyq sportshylar arasynan Denıs Nıkısha eń úzdik kórsetishke qol jetkizdi. Ol 500 metrlik qashyqtyqta 40.047 sekýndtyq kórsetkishpen tórtinshi orynǵa taban tiredi. Bul jarysta bas júldeni oljalaǵan Vý Daıszın álemdik rekordty jańartty. Onyń kórsetkishi –39.505 sekýnd. Qyzdar saıysynda Qazaqstan qurama komandasy músheleri arasynan Kım Iong A eń jaqsy nátıje kórsetti. Ol 1 000 metrlik qashyqtyqta segizinshi satyǵa turaqtady.
Álem kýbogynyń úshinshi kezeń Almaty ótkeli otyr. Sóz oraıy kelgende, short-trekten osyndaı dúbirli dodanyń Alataý baýraıynda tuńǵysh ret uıymdastyrylǵaly otyrǵanyn da esterińizge sala keteıik. Olaı bolsa, 7-9 jeltoqsan aralyǵynda barlyǵymyz «Halyq Arena» sport kesheninde bas qosyp, óz sportshylarymyzǵa qoldaý kórseteıik! Al jarystyń ashylý saltanaty 8 jeltoqsanda ótedi.
Álem kýbogynyń tórtinshi kezeńi kelesi jyldyń 1-3 aqpan aralyǵynda Germanııanyń Drezden shaharynda ótse, besinshi kezeńdik saıysty 8-10 aqpan aralyǵynda Italııanyń Týrın qalasy qabyldaıdy.
Ǵalym SÚLEIMEN,
«Egemen Qazaqstan»
ALMATY
