Meniń elim – Qazaqstan! Qandaı mártebeli, keýdeńde maqtanysh pen órelik otyn laýlatar qasıetti uǵym. Búginde Qazaq eli jer-jahanǵa tatýlyq pen berekeniń, beıbitshiliktiń ordasy retinde tanyldy. Al mundaı zor mártebege ıe bolý jolynda ata-babalarymyz jan aıamaı kúresip, Uly dalany keıingi urpaǵyna uly mura etip qaldyrdy.
Eýrazııa keńistiginde ornalasqan Qazaqstan búginde Memleket basshysynyń sarabdal saıasatynyń arqasynda beıbitshilik pen turaqtylyqty tý etken, álemniń qandaı elimen bolsyn ekonomıkalyq-saıası seriktes retinde óziniń ornyn myǵymdap, qandaı jaǵdaıda da terezesin teń ustaı alatyn dárejege jetti.
Elimizdiń keleshegi jolynda iske asyp jatqan áleýmettik-ekonomıkalyq baǵdarlar Uly dalany áli de jańa qyrynan, zor jetistikter údesinen tanytatyndyǵyna senim zor.
Osy tusta myna bir tarıhı derek kóńilge oralady. «Abylaı han dúnıeden ozar aldynda Buqar jyraýmen qoshtasyp: – Qansha jyl ómir súrip, jasaǵanymnan ne paıda, qazaqtyń arqasyn tamǵa, aýzyn nanǵa súıegenim joq, bul – bir. Aqbozattyń qunyn er qunyna teńegenim joq, eki.
Myltyǵymnyń qunyn eki erdiń quny degizgenim joq, usta men etikshiniń qunyn jarty qun degizip kesim kestirgenim joq, munym úsh. Osy úsh armanym boıymda ketti», degen eken. Abylaı hannyń osy úsh armanynyń ar jaǵynda úlken tujyrym jatyr. Bul onyń qazaqtyń basyn biriktirsem, ıaǵnı «Máńgilik el» etsem degenin, el bolashaǵyn tereńnen oılaǵanyn bildiredi emes pe?.. Babalarymyzdyń ótken jolyna zer salyp qarap otyrsaq, sonaý ótken zamanda arman bolǵan táýelsiz el, Máńgilik el bolý búginde Prezıdenttiń alǵa qoıǵan ıgi bastamalarynda jarqyn kórinis berip otyr. Prezıdent atap ótkenindeı, «Máńgilik el» – Qazaq eliniń ulttyq ıdeıasy.
Osy jolda elimizdiń aldaǵy jarqyn bolashaǵyn aıqyndap bergen «Qazaqstan-2050» strategııalyq bas qujaty bilim, densaýlyq, ekonomıka, t.b. salalardaǵy alar asýlarymyzdyń baǵdarshamy ispetti. Aldymyzda álemniń ozyq 30 memleketiniń qataryna qosylý mindeti tur. «Yrys – yntymaqqa jolyǵady, dáýlet – birlikpen tolyǵady» degen halqymyzdyń danalyǵyn eske alatyn bolsaq, «Uly dalanyń jeti qyryn» el aldynda naqtylap aıtyp bergen Memleket basshysynyń aldynda áli de halqyn bıikterge jeteleıtin uly murat jatyr. «Qýana bilgenge – qut qonady, baǵalaı bilgenge – baq qonady» deıdi halyq támsili. Qazaqstan búginde qydyr daryp, baq qonǵan, yrys jaılaǵan elge aınaldy!
Túsine bilgen adamǵa Táýelsizdik – asyl uǵym, uly murat. Táýelsizdik – halyqtyń baqyty. Prezıdent atap ótkenindeı, elińniń uly bolsań, elińe janyń ashysa, azamattyq namysyń bolsa, Qazaq memleketiniń nyǵaıyp, kórkeıýi jolynda jan terińdi syǵyp júrip eńbek et. Jerdiń de, eldiń de ıesi óziń ekenińdi umytpa!
Uly dala – qazaqtyń mekeni, ejelgi qonysy. Elimiz ólsheýsiz tabıǵat baılyǵymen ǵana emes, kóptegen ult ókilderin óziniń baýyryna basyp, beıbit ómir keship otyrǵan salıqaly saıasaty bar dara memleket.
Uly dala murattary ulttyq rýhymyzdy bekemdep qana qoımaı, ulttyq dástúrimizben, dinimizben, tilimizben, rýhanı baılyǵymyzdyń qýattylyǵymen jahandaný dáýirinde óz bıigine bastaıdy. 2025 jylǵa deıin latyn qarpine kóshemiz degen maqsat-mindetterimiz rýhanı kemeldenip, ulttyq rýhymyzdyń asqaqtaýyna yqpal etetin mańyzdy qadam. Memlekettiń órkenıetti sheshimi qazaq ultynyń ulttyq sanasyn bekemdep, álem halyqtarymen rýhanı kókjıegin keńeıtip, ǵasyrlar qoınaýynda jatqan ári ǵasyrdan-ǵasyrǵa jalǵasyn tabatyn mol muramyzdy pash etýge bastaıdy.
Uly dala urpaǵyn uly murattarǵa jeteleıtin ulttyq múdde. Olaı bolsa, Memleket basshysy alǵa qoıyp otyrǵan Uly dalanyń mańyzdy maqsattaryna qadam basqan kezeńde urpaǵymyzdyń kemel keleshegi jolynda ulttyq múddeni basty ustanym ete otyryp aıanbaı eńbek etýge tıispiz.
Arǵymaq atqa qamshy salǵandaı, endigi kezekte sózden iske kóshetin, bıik asýlarǵa jetetin sát týdy. Irgesi myǵym, beıbit qazaq dalasy Elbasynyń kóregendi saıasatynyń arqasynda áli de bıik mejelerge jetetindigine senim mol.
Jasan ZEKEIULY,
medısına ǵylymdarynyń doktory, Densaýlyq saqtaý isiniń úzdigi
