Úkili júırikterdiń úzdikterin atamas buryn jurttyń júreginen jol tapqan jobanyń maqsat, muraty jaıynda az-kem aıta ketsek, artyq bolmas. Elbasy N.Nazarbaev «Bolashaqqa baǵdar: rýhanı jańǵyrý» baǵdarlamalyq maqalasynda «Salt-dástúrimiz, tilimiz ben mýzykamyz, ádebıetimiz, joralǵylarymyz, bir sózben aıtqanda, ulttyq rýhymyz boıymyzda máńgi qalýǵa tıis» degen bolatyn. Qandaı da bir ulttyń óziniń ǵasyrlap qalyptasqan rýhanı murasy saltanat quryp tursa, ol eldiń rýhy bıik, ustyny men ustanymy myqty bolmaq. Ýaqyttyń daýyly men jaýynynda joǵalmaı, ótken kúnniń talaı synyna tózip bergen ómirsheń óner keleshektiń de ózegin taldyrmaıtyny anyq.
Aıta keteıik, Aqparat jáne kommýnıkasııalar mınıstrliginiń qoldaýymen «Qazaqstan» RTRK» AQ alǵash ret 2017 jyly júzege asyrǵan bul jobanyń bergeni az bolmady.
О́tkendi búgingi kúnmen órnekteı otyryp erteńge qyzmet ettirý maqsatynda qolǵa alynǵan «Men qazaqpyn» búginde óziniń alǵa qoıǵan maqsaty men júrgizilý júıesi arqyly halyqtyq jobaǵa aınaldy. Qazaqstannyń túkpir-túkpirindegi óneri bar jastardyń jarqyrap kórinýine jaqsy jaǵdaı jasady. Sonymen birge Reseı, Qytaı, Mońǵolııa elderinde turatyn qandastar arasynda irikteý jarystaryn ótkizip, olardyń Qazaqstanda óner báıgesine túsýine mol múmkindik týǵyzdy. Bir ókinishtisi, Qytaıdaǵy qandastar ortasynan kelgen ónerpazdar byltyr jobanyń jýan ortasyna kelgende at basyn keri burýǵa májbúr bolyp edi, bıyl múlde qatysa almady...
Obaly ne kerek, joba jetekshileri atalǵan elderge baryp, arnaıy túsirilim jasady, sol jerde jasaqtalǵan qazylarmen jobaǵa joldama alatyn ónerpazdardy iriktedi. Bul ońaı jumys emes. Uıymdastyrýshylardyń aıtýynsha, «Men qazaqpyn» megajobasyna bıyl 3 myńǵa jýyq úmitker qatysyp, sonyń 54-i telearnadaǵy jobadaǵy úlken báıgede baqtaryn synapty. Árıne, qýanarlyq jaǵdaı. Bul birinshiden, ulttyq ónerge umtylǵan jastar qarasynyń moldyǵyn kórsetse, ekinshiden, byltyrǵy jobanyń sátti júzege asqandyǵynyń aıǵaǵy.
Sonymen, aıtýly konsertke memleket jáne qoǵam qaıratkeri, «Men qazaqpyn» megajobasy qazylar alqasynyń tóraǵasy Myrzataı Joldasbekov, «Qazaqstan» RTRK» AQ Basqarma tóraǵasy, megajoba ıdeıasynyń avtory Erlan Qarın jáne «Qazaqstan» ulttyq telearnasynyń dırektory Erkin Tańatqanuly qatysyp, terme, kúı, án janrlary boıynsha marapattady.
Osy tusta jobanyń júrgizilý ereksheligi jaıynda da bir aýyz aıta ketýge týra keledi. Alamanǵa joldama alǵan ónerpaz alǵashqy aınalymda ózi daıyndap ákelgen shyǵarmasyn oryndasa, odan keıingi kezeńderde uıymdastyrýshylar daıyndaǵan týyndyny oryndaıdy. Ony tipti aldyn ala bilmeıdi de, mine, osy jerde úlken jaýapkershilik pen tuıaq súrindirer syn tur. Bul aınalymda ónerpaz jerebede shyqqan sol týyndyny bilýimen qatar belgili sharttarmen mektepterge bólingen ár óńirdiń oryndaýshylyq dástúrin de ıgergen bolýy tıis. Bul jıyn men toıda «áý» dep júrgen kez kelgen áýesqoıdyń qolynan keletin sharýa emes. Sondyqtan bul ánshi men kúıshi, jyrshynyń repertýaryn da tarazyǵa tartyp baǵady. «Eńisten salsań tóske ozǵan, erteden salsań keshke ozǵan» shyn júırikterdiń sýyrylyp shyǵatyn kezeńi de osy.
Sóıtip, osyndaı syndardan súrinbeı ótken toǵyz sańlaq báıgeniń qorytyndy keshine keldi. Iаǵnı, ár janrdan úsh ónerpaz qara úzip shyqty. Endi marapattaý úshin sahnaǵa kóterilgen adamnyń aýzynan júrekteri lúpildep otyrǵan úsheýdiń bireýiniń ǵana esimi atalmaq. Bul sheshimdi aıtý qazylarǵa da ońaı soqpasy anyq. Sonymen, jınalǵan jurttyń aldyna án janry boıynsha Alpysbek Ońaıbaıuly (Mańǵystaý oblysy), Raýan Əbilbaev (Almaty qalasy), Aıaýlym Qamajan (Astana qalasy), kúı janry boıynsha Jənibek Jəmıev (Atyraý oblysy), Shyńǵys Isaev (Túrkistan oblysy), Tańat Sədenov (Almaty oblysy), al terme janry boıynsha Kúnsulý Túrikpen (Qyzylorda oblysy), Saltanat Ersultan (Astana qalasy), Arýjan Erimova (Atyraý oblysy) shyqty.
Sonymen, kópten kútken sát jetti. Terme janry boıynsha jeńimpazdy marapattaýǵa shyqqan Erlan Qarın myrza qolyndaǵy qaǵazdan Kúnsulý Túrikpenniń esimin oqydy. Sóıtip, Kúnsulý úzdik termeshi atanyp 1 000 000 teńgeni qanjyǵalady. Al kúı atalymy boıynsha marapattaýǵa shyqqan Myrzataı Joldasbekov Jənibek Jəmıevtiń esimin atap,
1 000 000 teńge júldeni qolyna ustatty. Án janry boıynsha jeńimpaz esimin oqýǵa shyqqan Erkin Tańatqanuly úsh úmitkerdiń ekeýiniń esimin atady. Olar Alpysbek Ońaıbaıuly men Raýan Əbilbaev. Qazylar alqasy júldeni 500 000 teńgeden ekeýine teńdeı bólip beripti.
Gala-konsertte «Men qazaqpyn» jobasy qazylar alqasynyń músheleri Uljan Baıbosynova, Aıgúl Úlkenbaeva, Aıgúl Elshibaeva jáne I maýysymyndaǵy jeńimpazdary men bıylǵy úzdikter óner kórsetti. Jıynda sóz alǵan korporasııa basshysy Erlan Qarın: «Jobanyń maqsaty – elimizdiń túkpir-túkpirindegi dástúrli ánshi-termeshi, kúıshilerdiń basyn bir arnada toǵystyryp, elimizdiń ár aımaǵynda qalyptasqan óner mektepteriniń tańdaýly týyndylaryn dáripteý, atadan balaǵa mura bolyp kele jatqan tól ónerimiz – kúı, jyr-termeni damytyp, zamanǵa saı jańashalandyryp, óskeleń urpaqqa nasıhattaý» deı kele, ulttyq ónerge arnalǵan ózge de jobalardyń júzege asý aldynda turǵandyǵyn aıtty. Sondaı-aq jobany júzege asyrýǵa atsalysqan qazylar alqasyna, shyǵarmashylyq ujymǵa jáne qalyń kórermenge alǵysyn bildirdi. Ásirese, qazylar alqasyna erekshe rızashylyǵyn jetkizdi. Ádildik pende balasy úshin belgili deńgeıde shartty uǵym ekenin eskersek te, «Men qazaqpyn» megajobasyna qazylyq etken mamandardyń ónerpazdyń kózinshe artyq-kemin aıtyp otyrýy, keshegi Kenenderdiń kózin kórgen, ómiri men shyǵarmashylyǵy ulttyq ónermen bite qaınasyp ketken Myrzataıdaı asyl aǵalardyń ár oryndaýshyǵa aıtqan eskertýleri teledıdar arqyly ult óneri jaıynda oqylǵan sabaqtaı boldy desek artyq bolmas.
Ularbek NURǴALYMULY,
«Egemen Qazaqstan»
