«Oqý bitirgennen keıin jyl boıy jumysqa ornalaspaı bos júretin masyl jastar sanynyń azaıýy jóninen Qostanaı respýblıkada 2 orynda tur. Ústimizdegi jyldyń 1-jeltoqsanyna deıingi málimet boıynsha, oblysta jumyssyz jastardyń sany 3,1 prosent bolǵan, al respýblıka boıynsha kórsetkish 4,1 prosentke teń. 1-qazanda 23 778 adam jumyspen qamtý ortalyqtaryna jumys surap barsa, sonyń 5454 jastar bolatyn, ıaǵnı 23 prosenti. Olardyń barlyǵy áleýmettik jumysqa, jastar praktıkasyna, turaqty jáne maýsymdyq jumystarǵa jiberildi, sonymen qatar 724 adam jańa kásipke oqysa, 44 adam nesıe alyp, isin bastady, qoǵamdyq jumystarǵa myń qaraly jas bardy» dedi Oblystyq jastar saıasaty máseleleri basqarmasynyń basshysy Marat Jurqabaev.
Jyl boıy «Dıplommen – aýylǵa!» baǵdarlamasy boıynsha 4310 jas maman aýyldarǵa óz mamandyǵymen jumysqa turǵan. Olardy áleýmettik jaǵynan qoldaý úshin 4 mıllıard 310 mıllıon teńgeden asa qarjy bólindi. Qostanaı oblysynda «Serpin – 2050» memlekettik baǵdarlamasymen elimizdiń ońtústik, shyǵys, batys óńirlerinen 2015 jas joǵary jáne arnaýly orta oqý oryndarynda bilim alýda.
Keńes otyrysynda jastar máselesine qatysty oblysta kóptegen sharýa júzege asyp jatqanymen, olar úshin qoljetimdi bilim, jumyspen qamtý ornalasý, baspana, ásirese jas otbasylary úshin páter, úı alý máselesi ótkir kúıinde qalyp otyrǵany aıtyldy. Aldaǵy «Jastar jyly» elimizde 11 baǵytyn qamtyǵan Jol kartasy jasalǵany belgili. Oblysta da osy izben atqarylar jumystar naqtylanatyn bolady.
Názıra JÁRIMBET,
«Egemen Qazaqstan»
Qostanaı
