Bir qyzyǵy, saz mektebiniń jańa ǵımaraty Qurmanǵazy kóshesiniń boıynda ornalasqan. Turǵyndar osynyń ózin jaqsy yrymǵa balap otyr. 24 bala arnalǵan saz mektebinde ónerli oqýshylardyń jan-jaqty bilim alýyna barlyq jaǵdaı jasalǵan. Munda aspap synyptarymen qatar, bı, konsert zaldary bar. Qurylysqa Batys Qazaqstan oblystyq bıýdjetinen 87 mln. 615,9 myń teńge bólingen.
- Aýylymyzda saz mektebi 1965 jyly ashylǵan eken. Biraq buǵan deıin óziniń jeke ǵımaraty bolǵan emes. Saz mektebiniń qurylysy týraly turǵyndar kópten másele kóterip kelgen edi. Mine, 53 jyldan soń jańa saz mektebine qol jetkizip otyrmyz, - deıdi eńbek ardageri Ǵalymjan Nyǵmetov.
- Jańa osy jerge kelerde Qaztalov aýylyn aralap, Táýelsizdik, Jeltoqsan, Saýat, Syrym kóshelerine tóselgen asfaltty kórdik. Qaladaǵydaı jol, jaıaý júrginshilerge trotýar salynǵan. Al mynaý sý jańa saz mektebinde mektep oqýshylary qosymsha bilim alyp, ónerin óristetedi. Bıylǵy qarasha aıyndaǵy Joldaýynda Elbasymyz qazaqstandyqtardyń ómir sapasyn arttyrý týraly aıtty. Memlekettiń barlyq qýat-kúshi osyǵan jumsalady, - dedi osy sharaǵa arnaıy kelgen Batys Qazaqstan oblysynyń ákimi Altaı Kólginov.
Ákimniń aıtýynsha, bıyl Oral qalasynda kópqabatty 25 úı salynyp jatyr. Oblys aýmaǵynda 500 shaqyrymdyq avtokólik jolynyń qurylysy júrdi. Jaqynda Reseıdiń Saratov baǵytyna shyǵatyn 104 shaqyrymdyq jol telekópir arqyly tapsyrylady. Bıyl Batys Qazaqstan oblysynda 2 myń shaqyrymdyq sý qubyry tartylyp, 110 eldimekenge taza aýyz sý berildi, onyń 14-i – Qaztalov aýdanynda. 44 eldimekenge gaz qubyry tartyla bastaldy, onyń da 13 aýyly – Qaztalov aýdanynan. Keler jyly Qaztalov aýylyna keń jolaqty ınternet keledi.
- Biz baılanys mınıstrligimen, «Qazaqtelekom» mekemesimen kelisip, keler jyly «Sıfrly Qazaqstan» baǵdarlamasy aıasynda Batys Qazaqstan oblysynyń 93 eldimekenin keńjolaqty ınternetke qosatyn boldyq. Onyń da 13 aýyly – osy Qaztalov aýdanynda. Aýdan ortalyǵyndaǵy Alma Orazbaeva atyndaǵy mektepke jańa ǵımarat salý úshin 2019 jyly respýblıkadan qarjy bólinedi. Kórip otyrǵandaı, aldymyzda kóp jaqsylyq kútip tur, - dedi óńir basshysy.
Jınalǵan halyq Altaı Kólginovtiń sózin qol shapalaqtap qarsy aldy. Rasynda da aýyl turǵyndarynyń áleýmettik jaǵdaıy jaqsaryp keledi. 2019 jyly Qaztalovty Oral qalasymen jalǵaıtyn avtojol qurylysy aıaqtalmaq. Bir másele – dál búgin Qaztalov aýylynyń turǵyndaryna aýyz sý grafıkpen berilip otyr. Onyń sebebi, sý kóziniń tapshylyǵy. Biraq Altaı Kólginov aldaǵy jyly bul másele sheshiletinin, qubyr jańadan tabylǵan sý qoryna jalǵanatynyn aıtty.
- Aýdan ortapyǵyndaǵy jańadan saz mektebiniń qurylysy bastalǵan kezde barlyq ata-ana qýandyq. Qysqa ýaqytta qurylys aıaqtalyp, balalarymyz jap-jaryq, jyly orynǵa ornalasyp jatyr. Jańa mektepte balalarǵa barlyq jaǵdaı jasalǵan. Osyndaı jaǵdaı jasaǵan oblys, aýdan basshylaryna ata-analar atynan zor alǵys aıtamyz! Sondaı-aq biz de saz mektebine ata-analar atynan 170 myń teńgege sıntezator alyp berdik. Bul jańadan óz shańyraǵyn saılap jatyrǵan óner ujymyna degen qoldaýymyz bolmaq. Balalarymyzdyń ónerleri órkendeı bersin! – deıdi Qaztalov aýylynyń turǵyny Aınagúl Qabdolova.
Qazbek QUTTYMURATULY,
«Egemen Qazaqstan»
