Elimizdiń qaı túpkirinde bolmasyn, onyń eldi-mekenderi men aýyldarynda, aýdandary men qalalarynda, tipti oblys ortalyqtarynyń ózinde yrǵalyp-jyrǵalmaı, tez sheshimin tabýdy qajet etetin ózekti máseleler bolmaı turmaıdy. Eger bul jáıtter ýaqytynda oryndalmasa, turǵyndar tarapynan ár túrli túsinbestikter týyndaýy múmkin. Sondyqtan da tolǵaqty áleýmettik-turmystyq máselelerdi der kezinde retteýdiń mańyzy men róli joǵary. Bul úshin óńirde «О́zekti máseleler kartasy» qurylǵan. Soǵan sáıkes tıisti taldaýlar men zertteý jumystary júrgizilip keledi. Qabyrǵaly qujatqa kóz salsaq, qazirgi kezde shuǵyl sheshýdi qajet etetin 72 ózekti másele bar ekenin kóremiz. Onyń deni turǵyn-úı kommýnaldyq sharýashylyǵyna qatysty bolsa, kelesi kezektegi ózekti máseleler tizbegin avtokóik joldayna qatysty túıtkilder quraıdy. Sonymen birge turǵyn-úı qurylysy, mádenıet, sport jáne densaýlyq saqtaý salalarynda da túbegeıli sheshimin taýyp úlermegen máseleler bar ekeni aıqyn kórinedi. Onyń kólemi 22 paıyzdyq kórsetkishke tán.
Kartanyń aty – karta. Kartaǵa qarap, kóp jáıtterdi kóńilge toqýǵa bolady. О́ńirdegi ózekti máselelerdiń qazirgi jaǵdaıyn oı bezbeninen ótkizýge de múmkindik mol. Eń bastysy aımaqqa kartanyń kómegimen óz sheshimin kútken máselelerdi jedel ári kórneki túrde baqylaýǵa jol ashylǵan. Sodan soń onyń bári tıisti quzyrly organdardyń nazaryna berilip júr. О́z kezeginde olar naqty resýrstardyń kólemi men istiń oryndalý merzimin aıqyndap, naqty sheshim alyp júr.
Aıtalyq aımaqta aýdan ortalyqtary men qalalardyń kartasyn jasaqtaýdyń bastapqy kezeńinde 14 másele bolypty. Ári onyń báriniń sheshimi bıýdjet qarajatyn bólýge baılanysty óristepti. Búgingi kúni onyń jeteýi oń sheshimin tapqany belgili bolyp otyr. Atap aıtqanda atalmysh jobalar boıynsha 2,4 mıllıard tenge bıýdjet qarajaty bólindi. Sonymen birge aldaǵy 2019 jyly júzege asatyn jobalarǵa 894,3 mıllıon tenge, sondaı-aq budan keıingi 2020 jyly atqarylatyn jobalarǵa 490,6 mıllıon tenge bólý qarastyrylǵan. Qysqasy búgingi kúni óńirdegi jergilikti atqarýshy organdar, sonyń ishinde oblystyq basqarmalar men aýdandyq ákimdikter kartada kórsetilgen máselelerdi sheshýge bir kisideı jumylǵan. Mundaǵy basty ustanym – oryn alǵan ózekti máselelerdi qoıan-qoltyq ózara birlesip sheshý bolyp otyr.
Temir Qusaıyn,
«Egemen Qazaqstan»
AQTО́BE
