Baspasóz májilisine JITS-ti aldyn alý jáne onymen kúresý jónindegi respýblıkalyq ortalyǵynyń, Ulttyq fızıopýlmonologııa ortalyǵynyń mamandary qatysyp, bul dertterdiń taralaýy men jáne ol qandaı jaǵdaıda eldegi bızneske keri áser etpeıtindigi jaıly saýaldarǵa jaýap berdi.
Is-sharaǵa AITV dıagnozy anyqtalǵan, týberkýlezge shaldyqqan shaǵyn jáne orta, iri bıznes ókilderi de qatysyp, mundaı naýqasqa ushyraǵan jaǵdaıda Qazaqstanda bıznes júrgizýde qandaı máseleler týyndaıtyndyǵy jaıly áńgimeledi.
О́kinishke oraı, baspasóz májilisine qatysýshylar AITV jáne týberkýlezge baılanysty qoǵamda ózekti áleýmettik máseleler bar ekendigin atap ótti. Bul máselelerdiń kópshiligi vırýs jaıly durys aqparattyń jetispeýshiliginen týyndaıdy eken. Eńbek ujymynda AITV-ǵa, JITS-ke jáne týberkýlezge shaldyqqan azamattardy kemsitýge jol bermeý qazirgi zamanǵy qoǵamda asa mańyzdy rólge ıe bolyp otyr.
Azamattardy kemsitý vırýs juqtyrǵan jandardyń onsyz da qıyn jaǵdaıyn kúrdelendirip jiberedi. Osynyń nátıjesinde bilim alý, jumysqa turý, qandaı da bir tabys kózin izdeý kezinde olardyń aldynda kedergiler paıda bolatyndyqtan, olar qoǵamnyń ómirine tolyqqandy túrde at salysý múmkindiginen aıyrylady.
Osy oraıda, sońǵy jyldary ózge elderdegi memlekettik jáne úkimettik emes uıymdardyń kópshiligi qoǵamdy AITV/JITS jaıly keńinen aqparattandyrý baǵytynda qadam jasap jatyr.
Sondyqtan QR Densaýlyq saqtaý mınıstrligi memlekettik áleýmettik tapsyrys aıasynda bul máselede kópshiliktiń habardarlyǵyn kóterýge arnalǵan, sonyń ishinde kemsitýshilikti azaıtý, indet kórsetkishin tómendetý jáne Qazaqstandaǵy bızneske AITV men týberkýlezdiń áserin, ıaǵnı jahandyq báseke qabilettilik ındeksin kóterý maqsatynda bıznes-qurylymdarǵa AITV men týberkýlezdi aldyn alý jáne emdeýge qatysty is-sharalar legin júrgizýge kúsh salyp otyr.
Aınash ESALI,
«Egemen Qazaqstan»
ALMATY
