Elbasynyń «Rýhanı jańǵyrý» baǵdarlamasy aıasynda ótken aýqymdy sharany Qoǵamdyq damý mınıstrligi halyqty, bıznes-qurylym ókilderin, úkimettik emes uıymdardy, volonterlerdi kishi otanyn damytýǵa yntalandyrý jáne mesenattyq pen qaıyrylymdylyq ıdeıalaryn nasıhattaý maqsatynda uıymdastyrdy.
Premııa 5 nomınasııa boıynsha tabystaldy. Alǵashqysy – «Jyl mesenaty» premııasy. Ol týǵan jerinde iri áleýmettik jobalardy iske asyrǵany úshin, az qamtylǵan, kóp balaly januıalarǵa, ata-ananyń qaraýsyz qalǵan jetim balalarǵa, múgedekterge, UOS ardagerlerine, zeınetkerlerge qaıtarymsyz kómek kórsetkeni úshin tabystaldy. Marapat ıeleri qatarynda Maksım Artemýk, Ýálıhan Áripov, Janbolat Bekmusaev, Aleksandr Vılgelm, Jeńisbaı Dosqaıyrov, Serikjan Jeksembıev, Asqarbek Kerelbaev, Georgıı Prokop, Aıdyn Raqymbaev, Altynbek Saparov bar.
Belsendi azamattyq ustanymy, ártúrli baǵyttaǵy keń aýqymdy qaıyrymdylyq qyzmetti júzege asyrǵany úshin «Jyl tulǵasy» nomınasııasynda Aǵaıyndy Seralıevter, Saırambaı Dónenbaev, Marat Qudaıqulov, Raqymǵalı Qul-Muhammed, Azamat Moldaqasymov, Tileýbek Nurseıitov, Bolat О́temuratov, Janat Túsipbekov, Birjan Shaımerdenov, Dámetken Shákenova premııaǵa ıe boldy.
Bul júldeden áleýmettik mańyzy bar jobalardy, qaıyrymdylyq jobalardy, aksııalardy tıimdi júzege asyrǵany úshin, qaıyrymdylyq kómek berýdiń jańa tıimdi túrlerin engizgeni nemese qoǵamdyq mańyzy bar sharalarǵa bas demeýshilik jasaǵan uıymdar da kende qalmady. Igi is bastamashylary «Úzdik uıym» nomınasııasy boıynsha marapattaldy.
Kesh barysynda elimizdiń estrada juldyzdary Gúlnur Orazymbetova, Ushqyn Jamalbek, Qydyráli jáne Qaraqat ózderiniń án-shashýlarymen barlyq marapat ıelerin quttyqtap, týǵan jerge degen ystyq yqylastaryn bildirdi.
Ásem ánnen soń saltanatty rásim jalǵasyp, saıabaqtardy, alleıalardy, eskertkishterdi, balalar oıyn alańdaryn rekonstrýksııalaýǵa jáne salýǵa, densaýlyq saqtaý, mádenıet, bilim berý jáne sport salalaryna demeýshilik kómek kórsetýge baǵyttalǵan áleýmettik jobalardy iske asyrǵany úshin «Týǵan ólke» nomınasııasy boıynsha Baýyrjan Isabaev, Erbolat Qasymov, Muhıt Lesbaev, Aıbek Nuǵymarov, Aleksandr Polıakov, Talǵat Ysqaqov, Konstantın Pop, Erbolat Saýryqov, Ibragım Sársenbaev, Nurlybek Hamıtov júldeli boldy.
Sonymen qatar volonterlik qyzmetterge belsendi qatysyp, kózge túsken jandar da eleýsiz qalmady. Olarǵa «Eren eriktilik» nomınasııasy boıynsha premııa tabystaldy.
Aıta keteıik, marapat ıeleri onlaın daýys berý boıynsha anyqtaldy. Barlyq premııa ıelerine arnaıy sertıfıkat, gúl shoqtary jáne statýetkalar berildi.
Qarlyǵash QURAMYS,
«Egemen Qazaqstan»
