«О́zara baılanystylyq kóliktik baılanystar, ekonomıkalyq jáne energetıkalyq jeliler, sandyq jáne adamdyq ózara áreketterden turatyn kóptegen ólshemderge ıe. Ol qoldanystaǵy baılanystardyń tıimdiligin kúsheıte jáne jańa baılanystardy qura alady. EQYU ózara baılanysty ilgeriletýde mańyzdy ról atqara alar edi», - dedi óz sózinde Qazaqstannyń Syrtqy ister mınıstri Qaırat Ábdirahmanov.
Qazaqstan Vankýverden Vladıvostokqa deıingi keńistikte sozylǵan Qaýipsizdik qoǵamdastyǵy týraly 2010 jylǵy Astana deklarasııasyn engizýdi júzege asyrý úshin osy baǵytta úlken serpin berý mańyzdy dep esepteıdi. Sondaı-aq, Mınıstr 1994 jyly Prezıdent Nursultan Nazarbaev usynǵan eýrazııalyq yqpaldastyq ıdeıasy Eýrazııalyq ekonomıkalyq odaqqa sátti engizilgendigin eske saldy. Búgingi kúni Eýrazııadaǵy túrli ıntegrasııalyq jobalar arasyndaǵy ózara árekettestikti qamtamasyz etý máselesi ózekti.
О́zara baılanystylyq turǵysynda Qazaqstan EQYU-nyń Astanadaǵy qatysýyn odan ári Baǵdarlama keńsesinen Taqyryptyq ortalyǵyna transformasııalaý boıynsha óz kózqarasyn usyndy. Mınıstr dalalyq mıssııanyń evolıýsııasy árqashan eldiń damýymen qatar júrip jatqandyǵyn jáne «Qazaqstannyń ekonomıkalyq jáne saıası damýdaǵy qazirgi jetistikteri jańa tásilderdi qajet etetinin» málimdedi.
«Jańa qurylym tájirıbe, analıtıkalyq jáne zertteý jumystarymen almasýǵa járdemdesý arqyly turaqty ózara baılanystylyq pen «jasyl» ekonomıkaǵa kóshý máselelerine baǵyttalýy kerek. Mysaly tıisti basqarý, jasyl ekonomıkany damytý, apattardyń aldyn alý, energetıkalyq qaýipsizdikti qamtamasyz etý, EQYU keńistiginde saýda men kólik salalaryn ilgeriletý salasyndaǵy jobalardy júzege asyrý múmkin», - dep atap ótilgen habarlamada.
Qazaqstan EQYU-nyń Astanadaǵy jańa býyny EQYU, AО́SShK, ShYU, ASEAN jáne basqa da uıymdar arasyndaǵy ózara tıimdi seriktestik úshin jańa múmkindikter ashady dep esepteıdi.
EQYU-daǵy ıtalıandyq tóraǵalyqtyń ókili, Italııanyń Syrtqy ister mınıstriniń orynbasary Gılermo Pıkkı EQYU keńistigindegi qaqtyǵys áleýetiniń artýy jaǵdaıynda ekonomıkalyq jáne ekologııalyq ólshemniń rólin atap ótti.
Belarýs Respýblıkasynyń Syrtqy ister mınıstri Vladımır Makeı EQYU-nyń ekonomıkalyq ózara baılanystylyq platformasy retindegi rólin atap ótti.
Ázirbaıjan Syrtqy ister mınıstri Elmar Mamedıarov kólik dálizderin jáne EQYU aıasynda tıisti basqarýdy damytýǵa shaqyrdy.
Bırmıngem ýnıversıtetiniń professory Stefan Volf EQYU-daǵy ekonomıkalyq dıplomatııanyń úlken áleýetin atap ótti.
Is-shara damý jáne qaýipsizdik máseleleri arasyndaǵy ajyramas baılanys qaǵıdaty negizinde Qazaqstan qoldaý kórsetetin EQYU-nyń ekonomıkalyq jáne ekologııalyq ólsheminiń áleýetin taǵy bir ret kórsetýge múmkindik berdi.
