Is-sharada Táýelsizdik jyldary qol jetkizgen uly jetistikter jaıy keńinen sóz boldy. Jıynda Shymkent qalalyq túrik etnomádenı birlestiginiń tóraǵasy Latıfsha Asanov osy jyldar ishindegi basty tabysymyz – Qazaqstan halqynyń birtutastyǵy bolǵanyn atap ótti.
- Bıyl biz – el Táýelsizdiginiń 27 jylyna aıaq basqaly otyrmyz. Osy jyldary Assambleıa elimizde beıbitshilik pen myzǵymas tatýlyqty ornyqtyrýda bitimi bólek ınstıtýt bolyp qalyptasyp, elimizdiń órkendeýine zor úles qosty. Búginde mıllıonnan astam turǵyny bar Shymkent qalasyn damytý maqsatynda aýqymdy jumystar qolǵa alynyp, jańa jobalar iske asýda. Osy baǵyttaǵy ınvestısııa tartý men halyqqa qyzmet kórsetetin salalarda kásibi bar assambleıa músheleri osyndaı bastamalarǵa barynsha jumylyp, ortaq otanymyzdy kórkeıtýge laıyqty úles qosyp keledi, - dedi túrik etnomádenı birlestiginiń basshysy.
Merekelik shara aıasynda «Halyqtyq brend» taqyrybynda jergilikti taýar óndirýshilerdiń kórmesi uıymdastyryldy. Oǵan kásipkerlikpen aınalysyp júrgen túrli etnos ókilderi qatysty. Kásipkerler ózderi óndirip jatqan taýarlardy jurtshylyq nazaryna usynyp, bıznestegi tájirıbelerimen bólisti.
Kórmede kópshilik zamanaýı úlgidegi aıaq kıimniń 200 túrli modelin óndiretin «SP «Lux SHOES» fabrıkasynyń ónimderine erekshe qyzyǵýshylyq tanytty. Túrkııa kásipkerlerimen birlese jumys istep jatqan shymkenttik kásiporyn ónimderi taıaýda shetelge de eksporttalmaq. Fabrıka basshysy Zahıd Ergashev osyndaı berekeli bastamalar elimizdegi turaqtylyq pen etnosaralyq tatýlyqtyń jemisi dep sanaıdy.
Nurshat TО́KEN,
«Egemen Qazaqstan»
