Turǵyndardy Tuńǵysh Prezıdent kúnimen qatar kelgen qýanyshtarymen oblys ákimi Bolat Baqaýov quttyqtap, páter kiltterin saltanatty túrde tabys etti.
Jańa úıden páter alǵan Indıra Saıfýrova 15 jyldaı kezekte turyp, qarajatyn «Turǵyn úı qurylys jınaq» AQ bankinde jınaǵan eken.
– «Nurly jer» baǵdarlamasy boıynsha páter qunynyń 50 paıyzyn jınap, páter aldym. Endi 6 jyl ishinde qalǵan aqshasyn tóleımin, – deıdi Indıra.
Páterdiń bir sharshy metri – 121 myń teńge. Memlekettik baǵdarlamalarǵa qatysý úshin «Turǵyn úı qurylys jınaq» AQ bankinde páter qunynyń 20 paıyzyn quraıtyn salymǵa ıe bolý kerek. Bul kúnderi óńirdiń árbir 13-shi turǵyny, ıaǵnı 55 myń adam «Turǵyn úı qurylys jınaq banki» arqyly úı alýǵa aqsha jınaýda.
Al «Turǵyn úı qurylys jınaq banki» AQ oblystyq fılıalynyń basshysy Talǵat Baıylovtyń aıtýynsha, bankten esepshot ashyp, turǵyn úı alý maqsatynda aqsha salýshylardyń qatary kóbeıýde. Jańa jyl merekesi qarsańynda taǵy da 288 bank salymshysy páter almaq. Al 2019 jyldyń naýryz aıyna deıin 216 páter paıdalanýǵa beriledi dep josparlanǵan.
Byltyr shaǵyn aýdanda 6 turǵyn úıdiń qurylysy aıaqtalyp, kóptegen turǵyndar qonys toıyn toılaǵan-dy. Oblystyq qurylys basqarmasynyń málimetinshe, oblys ortalyǵynyń bas josparyna sáıkes shaǵyn aýdanda 600 balaǵa arnalǵan mektep salý jobasy daıyndalýda. Burynǵy eski qalashyqtaǵy №159-úı buzylyp, bul aýmaq qazir qyzý qurylys alańyna aınaldy.
Al «2020 jylǵa deıin óńirlerdi damytý» baǵdarlamasy arqyly salynyp jatqan «Saryarqa» turǵyn úıler kesheniniń qurylysy 2021 jyly aıaqtalady dep josparlanǵan. Sonymen birge «Nurly jer» baǵdarlamasy boıynsha bul kúnderi oblys ortalyǵynda «Dostyq» shaǵyn aýdanynyń qurylysy bastaldy.
Farıda BYQAI,
«Egemen Qazaqstan»
PAVLODAR
