Is-sharaǵa Qazaqstan Respýblıkasy Prezıdentiniń janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń músheleri, Parlament depýtattary, memlekettik organdardyń basshylary, dıplomatııalyq korpýs, halyqaralyq uıymdar, bıznes qurylymdary, azamattyq qoǵam ókilderi keldi.
Otyrysty ashqan Memlekettik hatshy Elbasy Nursultan Nazarbaevtyń egemendikti ornatý jáne ony nyǵaıtý isinde Qazaqstan áıelderiniń zor ról atqarǵany jóninde aıtqan sózine toqtaldy.
– Ana men balany qorǵaý, áıelderdiń quqyǵy men múmkindikterin keńeıtý máseleleri – memlekettik saıasattyń mańyzdy basymdyqtarynyń biri. Qazaqstannyń otbasylyq-genderlik saıasat salasyndaǵy jetistikterine memlekettik organdardyń, azamattyq qoǵam men bıznes qoǵamdastyqtyń ózara tıimdi is-áreketi nátıjesinde qol jetkizildi, – dedi G.Ábdiqalyqova.
Ulttyq komıssııanyń 20 jyldaǵy qyzmeti barysynda Genderlik teńdik strategııasy júzege asyryldy. Genderlik baǵyttaǵy «Erler men áıelderdiń teń quqyqtarynyń jáne teń múmkindikteriniń memlekettik kepildikteri týraly», «Turmystyq zorlyq-zombylyq profılaktıkasy týraly» zańdar qabyldandy. Qazaqstan Respýblıkasyndaǵy 2030 jylǵa deıingi otbasylyq jáne genderlik saıasat tujyrymdamasy iske asyrylýda. Barlyq memlekettik organda genderlik saıasatty iske asyrýǵa jaýapty tulǵalar belgilendi.
Búginde depýtattardyń jalpy sanynyń 22 paıyzy nemese 34-i – áıel, memlekettik qyzmette 55 paıyzǵa jýyq, saıası memlekettik qyzmetshiler arasynda 10 paıyzdan astam áıel eńbek etedi. Shaǵyn jáne orta bızneste 500 myńnan asa kompanııany áıelder basqarady.
– Qazaqstannyń áıelder qoǵamdastyǵy aldynda turǵan basty mindetter: «Qazaqstan-2050» strategııasyn iske asyrý, 2030 jylǵa deıingi Ornyqty damý maqsattaryna qol jetkizý, 2030 jylǵa deıingi otbasylyq jáne genderlik saıasat tujyrymdamasy ındıkatorlarynyń oryndalýyna belsene atsalysý, – dedi Memlekettik hatshy.
Sońynda Qazaqstan Respýblıkasynyń Memlekettik hatshysy Gúlshara Ábdiqalyqova konferensııada aıtylǵan jańa ıdeıalar, oılar men usynystar Ulttyq komıssııanyń odan ári jumysynda qoldanylatynyn atap kórsetti.
Marjan TILEÝBEK,
«Egemen Qazaqstan»
