Jeltoqsannyń 4-inde «Rossııa segodnıa» halyqaralyq aqparattyq agenttiginiń baspasóz ortalyǵynda Búkilreseılik qoǵamdyq pikirdi zertteý ortalyǵynyń (VSIOM) Reseı azamattarynyń TMD elderine kózqarasyn anyqtaıtyn jyl saıynǵy zertteý nátıjeleri usynyldy.
Reseılik respondentter TMD elderiniń jetistigin qalaı baǵalaıtyny, qaısysyn Reseıdiń áriptesi retinde kórgisi keletini jáne memleketter basshylarynyń qaısysyna senim bildiretini jónindegi saýalnamaǵa jaýap bergen.
Búkilreseılik qoǵamdyq pikirdi zertteý ortalyǵy departamentiniń dırektory Stepan Lvovtyń aıtýynsha, saýalnama 2018 jylǵy 8 qazanda Reseıdiń 1600 respondenti arasynda ótkizilgen. Zertteý 2010 jyldan beri júrgizilip keledi. Osy jylǵy zertteý kórsetkendeı, TMD keńistiginde reseılikter Qazaqstandy jáne Belarýs Respýblıkasyn eń turaqty jáne tabysty dep esepteıdi. 2010 jyldan bastap Qazaqstanǵa qatysty eń joǵary nátıje belgili boldy: respondentterdiń 52%-y (2017 jyly 41%) jaýap bergen. Qazaqstannan basqa TMD elderi jetistik reıtınginde qalys qalǵan. Ázerbaıjan 2018 jyly 16% (2017 aksııasynda 14%) jınady, Armenııa – 14% (2017 aksııasynda 16%), Grýzııa – 12%, О́zbekstan – 10%, Túrikmenstan – 8%, Qyrǵyzstan jáne Tájikstan – 5%, Moldavııa – 4%, Ýkraına 2% jınaǵan.
Osy saýalnama boıynsha Qazaqstan men Belarýs prezıdentteri dástúrli túrde postkeńestik memleketter kóshbasshylaryna senim reıtınginde kósh bastap tur.
Zertteýdiń osy nátıjelerine túsinikteme bere otyryp, óńirlik problemalar ınstıtýtynyń dırektory Dmıtrıı Jýravlev keltirilgen saýalnama osy elderde eshqashan bolmaǵan qarapaıym reseılikterdiń pikiri ekenin nazarǵa aldy. «Iаǵnı bul adamdardyń osy elderge degen kózqarasy emes, olar týraly aqparatqa degen kózqarasy», – dep atap ótti sarapshy.
Sarapshylardyń pikirinshe, zertteý nátıjeleri postkeńestik keńistiktegi úderisterdiń dınamıkasyn naqty kórsete alady. Burynǵy KSRO keńistigindegi elderde jańa kóshbasshylardyń paıda bolýyna qaramastan, reseılikterdiń Qazaqstanǵa jáne onyń Prezıdentine degen qatynasy turaqty joǵary deńgeıde qalyp otyr.
«Rossııskaıa gazeta» tilshisiniń «2025 jyldan keıin latyn álipbıine kóshýine baılanysty Qazaqstan men Reseıdiń qarym-qatynasy ózgerýi múmkin be?» degen suraǵyna, barlyq sarapshylar biraýyzdan olaı dep oılamaıtynyn aıtqan.
Aqmaral AǴZAMQYZY,
«Egemen Qazaqstan»
