Máskeý bul máselege qatysty túbek arqyly ótetin keme jolyn eshqashan jaýyp tastamaǵanyn, kidirister baıqalǵan bolsa, ol «aýa raıynyń qolaısyzdyǵynan týyndaýy múmkin» ekenin málimdedi.
Irgeles eki eldiń arasyndaǵy qarym-qatynastyń burynǵydan da shıelenise túsýi qarashanyń 25-inde reseılik áskerılerdiń Ýkraınanyń úsh áskerı kemesin atqylap, 20 shaqty teńizshisin tutqynǵa alýynan keıin baıqalǵan-dy.
Bul oqıǵaǵa qatysty qos tarap birin-biri kinálap otyr. Máskeý «Kıev arandatý maqsatymen bizdiń teńizdegi shekaramyzdy qasaqana buzdy» dese, Ýkraına «bul Reseıdiń kezekti basqynshylyq áreketi» dep málimdedi.
Osydan keıin Ýkraınanyń Joǵarǵy radasy prezıdent Petr Poroshenkonyń eldiń jekelegen oblystarynda otyz kúnge deıin soǵys jaǵdaıyn engizý týraly jarlyǵyn maquldady. Al Reseı taraby ustalǵan teńizshilerge shekarany zańsyz kesip ótkeni jónindegi bappen aıyp taqty. Mundaı bappen aıyptalǵandarǵa qoldanylatyn jaza – alty jylǵa deıin bas bostandyǵynan aıyrý. Sońǵy málimetterge qaraǵanda, ýkraınalyq áskerıler Máskeýge jóneltilgen.
Reseı-Ýkraına shıelenisi NATO syrtqy ister mınıstrleriniń kezdesýinde de kóterilip, alıanstyń bas hatshysy Iens Stoltenberg Reseıdi ýkraındyq teńizshiler men kemelerdi bosatýǵa, sondaı-aq Azov teńizindegi Ýkraına porttaryna erkin jol ashýǵa shaqyrǵan-dy. Iens Stoltenbergtiń aıtýynsha, odaqtastar Qara teńizdegi áskerı qımyldaryn, bul aýdandaǵy áýe baqylaýyn kúsheıtken.
Qara teńiz ben Azov tóńireginde Reseı men Ýkraına shıelenisiniń shıryǵa túsýine Eýropalyq odaq ta aıryqsha alańdaýshylyq bildirýde. Joǵaryda atalǵan NATO jıynynda Eýroodaqtyń Syrtqy saıasat pen qaýipsizdik boıynsha joǵarǵy ókili Federıka Mogerını «Ýkraınanyń terrıtorııalyq tutastyǵy men egemendigine jańa qaýip tóndi jáne onyń syrtqy saýdasyna kedergiler jasaldy», dep málimdedi. «Azov teńizindegi belsendilik Eýroodaqqa múshe elderdiń týyn kótergen kemelerdiń qozǵalysyn qatty kidirtýde. Bul ekonomıkamyzǵa yqpal etedi», dedi ol. Bul rette Ýkraına Eýropalyq odaqtan Reseıge qarsy sanksııalardy odan ári kúsheıte túsýdi ótinip otyr.
Reseı bıligi bolsa, bul oqıǵanyń astarynda Ýkraınada aldaǵy 2019 jyly ótetin prezıdenttik saılaý qarsańynda saıası upaı jınaý máselesi jatyr, sol úshin uıymdastyrylǵan áreket degendi kóldeneń tartyp otyr.
Eki el arasyndaǵy burynǵydan da salqyndaı túsken qarym-qatynas – qazirgi kúni jahandyq kún tártibindegi basty taqyryptardyń biri. Ýkraınanyń sanksııalar jónindegi ótinishine qatysty Eýroodaq jaǵdaı ýshyǵa tússe, tıisti sharalar qoldaný josparlanyp otyrǵanyn málimdedi. Bul másele Eýroodaqtyń 10 jeltoqsanda ótetin sammıtinde talqylanbaqshy.
Qambar AHMET,
«Egemen Qazaqstan»
