Saýdadaǵy barlyq kedergini joıý qajet
Alǵashqylardyń biri bolyp TASS aqparat agenttigi jazdy. Aqparat quraly Qazaqstan Prezıdentiniń «Bizge 2025 jylǵa qaraı ózara saýdadaǵy barlyq kedergini joıý qajet. Bul – birlestigimizdiń tolyqqandy qyzmet etýiniń mańyzdy talaby», degen sózin keltire otyryp, N.Nazarbaev Eýrazııalyq ekonomıkalyq komıssııa men úkimetterge osy baǵyttaǵy jumysty jandandyrý qajet dep esepteıtinin jazdy.
Budan ári Elbasynyń ekonomıkanyń basty sektorlaryndaǵy iri jobalardy iske asyrý qajettiligine de toqtalǵanyn, osyǵan baılanysty, Komıssııa men Eýrazııa ekonomıkalyq odaǵyna múshe elderdiń úkimetterine osyndaı jobalardyń tizimin jasaý usynylǵanyn da aıtyp ótken.
О́zara yqpaldastyqty keńeıtý mańyzdy
Nursultan Nazarbaevtyń 2025 jylǵa qaraı EAEO elderiniń ózara saýdasyndaǵy barlyq kedergilerdi joıýǵa shaqyrǵany, sondaı-aq EAEO aıasynda ózara yqpaldastyqty odan ári keńeıtý úderisterine qoldaý kórsetip, Eýrazııa ekonomıkalyq komıssııasy men oǵan múshe elderdiń úkimetteri tarapynan jańa jumys baǵyttarynyń árqaısysynyń ekonomıkalyq turǵydan maqsatqa qanshalyqty saı keletindigine tereń taldaý jasaý qajettigin atap ótkenin Interfax aqparat agenttigi de habarlady.
Aqparat agenttigi N.Nazarbaevtyń: «Jalpy, biz Eýrazııa ekonomıkalyq odaǵynyń negizgi maqsattaryna – taýarlar men qyzmetterdiń, kapıtal men jumys kúshiniń erkin aınalymyn qamtamasyz etýge batyl qadam jasap kelemiz. Sonymen birge Eýrazııa ekonomıkalyq odaǵynyń tolyqqandy jumys isteýin qamtamasyz etý úshin taǵy da kúsh jumyldyrýymyz kerek», degen sózderin mysalǵa alǵan.
Sondaı-aq Memleket basshysynyń tórt «erkindikti» qamtamasyz etýge baǵyttalǵan qujattar boıynsha jumysty aıaqtaýdyń, sonyń ishinde EAEO elderiniń azamattaryn zeınetaqymen qamtý týraly kelisimniń mańyzdylyǵyn aıtqanyn da atap kórsetken.
EAEO-da ósimniń oń qarqyny bar
Belarýs telegraf agenttigi Sankt-Peterbýrgte ótken Joǵary Eýrazııalyq ekonomıkalyq keńestiń otyrysynda Qazaqstan Prezıdenti Nursultan Nazarbaevtyń Eýrazııalyq ekonomıkalyq odaqtaǵy ósimniń oń dınamıkasyn atap kórsetkenine toqtaldy. «Álemdik ekonomıkanyń qubylmalylyǵyna baılanysty syrtqy jaǵdaılar men táýekelderge qaramastan, biz ósimniń oń qarqynyn saqtap qala aldyq. Bıylǵy qańtar-qyrkúıek aılarynda syrtqy jáne ózara saýda-sattyq kólemi aıtarlyqtaı artty» dedi Qazaqstan Prezıdenti. Budan ári aqparat agenttigi EAEO IJО́-niń jıyntyq kóleminiń, kapıtalǵa salynǵan ınvestısııalar men ónerkásiptik óndiristiń qanshalyqty paıyzǵa óskenin salystyra otyryp kórsetken.
Sıfrlandyrý máseleleri sóz boldy
CA-News Qazaqstan Prezıdentiniń sıflandyrýdyń qanshalyqty mańyzdy ekenin ári osy jolda atqarylyp jatqan mańyzdy máselelerdi aıtqanyn jazdy. Jıynda N.Nazarbaev sıfrlandyrý máseleleriniń 2025 jylǵa deıingi negizgi baǵyttaryn iske asyrý jónindegi jumystardyń nátıjelerine toqtalǵan bolatyn.
Daıyndaǵan Mádına JÁLELQYZY,
«Egemen Qazaqstan»
