«Jeltoqsan aıynyń basynda ótken aptalyq sharanyń maqsaty – qoǵamdyq kólik júrgizýshileriniń jaýapkershiligin pysyqtaý, jol júrý erejesi saqtalýyn qamtamasyz etý» deıdi Batys Qazaqstan oblystyq polısııa departamenti baspasóz qyzmeti.
Jergilikti bılik oryndarymen birlese reıd ótkizgen 4 kún ishinde 400-den asa quqyqbuzýshylyq anyqtalyp, hattama toltyrylypty. Máselen, 68 júrgizýshi jyldamdyqty ruqsat etilgen mólsherden asyrsa, kólik manevri kezinde 133 márte ereje buzylǵan. Rólde kele jatyp telefon paıdalanǵany úshin 115 júrgizýshi, kóligin ýaqytyly tehnıkalyq baıqaýdan ótkizbegeni úshin 43 júrgizýshi aıypty boldy. Budan bólek 71 quqyqbuzýshylyq anyqtalǵan.
Qazir qys, qaladaǵy kólik qozǵalysy qıyndady. Saqtyqty kúsheıtpese bolmaıdy. Sonyń ishinde qoǵamdyq kólik júrgizýshileri men jolaýshy tasymalymen aınalysatyn mekemelerdiń jaýapkershiligi joǵary bolýy tıis. Reıd kezinde anyqtalǵan quqyqbuzýshylyqtar úshin Oral qalasyndaǵy avtobýs parkteriniń laýazymdy 7 qyzmetkeri de ákimshilik jaýapqa tartylǵan.
