Halyqaralyq Olımpıada komıteti men Sporttyq arbıtrajdy sottyń Tártiptik komıssııasy 2008 jyly Beıjińde ótken jazǵy Olımpıada oıyndarynda aýyr atletıkadan 75 keli salmaqta birinshi oryn ıelengen qytaılyq Leı Saonyń sporttan shettetilgenin habarlaıdy. Sondaı-aq, Halyqaralyq aýyr atletıka federasııasynyń qaıta tekserýinen soń qazaqstandyq Alla Vajenına Beıjiń Olımpıadasynyń altyn júldegeri dep tanyldy.
Sonymen qatar, 2008 jylǵy Beıjiń Olımpıadasynda úsh qarǵyp sekirýden tórtinshi oryn ıelengen Olga Rypakova sportshylar dopıng-synamasyn qaıta teksergen soń Olımpıadanyń kúmis júldegeri dep tanyldy. HOK pen CAS Tártiptik komıssııasy reseılik Tatıana Lebedeva men grekııalyq Krısopıgı Devetsıdi sporttan shettetti.
2012 jylǵy London Olımpıadasynda aýyr atletıkadan 69 keli salmaq dárejesinde 5-shi oryn ıelengen qazaqstandyq Anna Nurmuhambetova Olımpıadanyń qola júldegeri dep tanyldy. Mundaı sheshimge Tártiptik komıssııa Olımpıada oıyndarynda tıisinshe ekinshi jáne úshinshi oryn ıelengen Marına Shkermankova men Dzına Sazanavesti sporttan shettetken soń qabyldady.
Osylaısha, Alla Vajenına 2008 jylǵy Olımpıada oıyndarynyń chempıony, Olga Rypakova Beıjiń Olımpıadasynyń kúmis júldegeri jáne Anna Nurmuhambetova London Olımpıadasynyń qola júldegeri atandy.
HOK medaldi tabystaý ýaqyty men ornyn sportshylardyń ózderi tańdaıtynyn jetkizdi. Esterińizde bolsa, Denıs Ýlanov Rıo Olımpıadasynyń qola medalin Ashhabadta ótken álem chempıonatynda qabyl alǵan bolatyn.
Aıta ketelik, UOK halyqaralyq qatynastar Departamentiniń belsendi qyzmetiniń arqasynda HOK jáne halyqaralyq federasııalarmen medaldardy retteý jóninde jedel aqparat alýǵa múmkindik bar.
