«Fokýs Qazaqstan» jobasy aıasynda London (Ulybrıtanııa), Berlın (Germanııa), Djersı Sıtı (AQSh) qalalarynda ótken taqyryptyq kórme endi Sývon qalasyna sapar shekti. Joba kýratory Roza Ábenovanyń aıtýynsha, baǵdarlama halyqaralyq arenadaǵy Qazaqstannyń zamanaýı beıneleý ónerin aıtýly deńgeıde kórsete alǵan birden bir tabysty mysal.
– Tórtinshi ret ótkizilip otyrǵan kórmede 400-ge jýyq jumys jáne 94 sýretshiniń muraǵattyq qujattary kórsetildi. Jobanyń sońynda ár kórme boıynsha katalogtar shyǵarylady. «Eýrazııalyq ýtopııa: Post Scriptum» kórmesi keńestik kezeńniń jáne zamanaýı sýretshilerdiń shyǵarmashylyǵyn zerdeleý, kórkemdik dástúrdiń jalǵasy men úzilýin kórsetý, respýblıkamyzdyń táýelsizdigi kezeńindegi qazirgi zamanǵy ónerdiń dúnıege kelýin, jańa dıskýrstar men medıanyń paıda bolýyn zertteý arqyly qazaqstandyq ónerdiń narratıvin anyqtaýǵa tyrysady, – deıdi ol.
Ulttyq sýret óneri mektebiniń erekshelikteri, «jergilikti modernızm» fenomeni jáne táýelsizdik kezeńindegi óner – osy kórmeniń basty taqyryptary. Kórmede Úki Ájıevtiń, Olga Kýjelenkonyń, Salahıtdın Aıtbaevtyń, Jańataı Shárdenovtiń, Evgenıı Sıdorkınniń, Alekseı Stepanovtyń, Mıhaıl Kımniń, Borıs Paktyń, Ábdirashıt Sydyhanovtyń, Rýstam Halfınniń, Sergeı Maslovtyń, Sáken Narynovtyń, Serikbaı Áljanovtyń, Erbosyn Meldibekovtiń, Elena men Vıktor Vorobevtardyń, Aleksandr Ýgaıdyń, Baqyt Búbiqanovtyń, Álibek Mergenovtiń, Sáýle Dúısenbınanyń, Nurbol Nurahmettiń jáne basqalarynyń shyǵarmalary usynyldy. «Eýrazııalyq ýtopııa: Post Scriptum» kórmesiniń jetekshileriniń biri Shın Yn Iаngtiń (Ońtústik Koreıa) aıtýynsha, Qazaqstan men Koreıanyń tarıhı ortaq tustary kóp ári qazaq mádenıeti men dúnıetanymyn tanystyrýda atalǵan kórmeniń orny erekshe. Kórme 2019 jyldyń 3 naýryzyna deıin jalǵasady. «Fokýs Qazaqstan» jobasyn Mádenıet jáne sport mınıstrliginiń qoldaýymen Qazaqstan Respýblıkasynyń Ulttyq mýzeıi uıymdastyryp otyr.
Aıa О́MIRTAI,
«Egemen Qazaqstan»
