1997 jyldyń 10 jeltoqsanynda el astanasy Almatydan Aqmola qalasyna resmı túrde kóshirilgen bolatyn. Osy kúnge oraılastyrylyp Astanada alǵash ret «Elorda juldyzy» premııasy taǵaıyndaldy. Ol endi jyl saıyn taǵaıyndalatyn bolady.
«Qurmetti qala turǵyndary men qonaqtary! Sizderdi shyn júrekten búgingi merekemen quttyqtaımyn. 21 jyl buryn men de jas maman retinde poezǵa otyryp, borandy tańda Astanaǵa kelgenmin. Sodan beri kóp dúnıe ózgerdi. Men úshin osy ataýly kúnde myna sahnada turyp sizderdi quttyqtaý úlken qurmet», dedi qala ákimi Baqyt Sultanov.
Qurmetti marapat elimizdiń bas qalasynyń damýyna eleýli úles qosqan jáne onyń dańqyn álemge tanytqan elordalyq ujymdar, uıymdar men tanymal turǵyndarǵa berildi. Saltanatty túrde estelik hrýstal músinder «Astana Ballet» teatryna, «Astana Opera» teatryna, «EKSPO-2017» halyqaralyq mamandandyrylǵan kórmesine, Nazarbaev ýnıversıtetine, «Astana» fýtbol klýbyna, «Barys» hokkeı klýbyna, «Astana» velokomandasyna, «Sparta-Nomad Astana» KTK komandasyna, «Jastar» teatryna, sondaı-aq, medısınalyq klaster ókilderi Iýrıı Pıa jáne Serik Aqsholaqovqa tabys etildi.
«Bul kún Astana úshin mańyzdy. Astana damyp keledi, saıası, mádenı, sport salalarynda tanymal boldy. Astanany ujymdar, uıymdar, kásiporyndar men adamdar tanytty. Osy jyly jańa jáne qarqyndy damýshy Elordamyzdyń tanylýyna eleýli úles qosqan ujymdar men adamdardy atap ótkimiz keldi», dedi Astana qalasy mádenıet jáne sport basqarmasy basshysynyń orynbasary Narıma Muhambetalına.
Merekelik konsertti «Astana Ballet» trýppasynyń horeografııalyq qoıylymy ashty. Merekelik keshte Qaırat Baekenov, Alen Samyken, Aǵaıyndy Júgúnisovter, Sara Isak, Aınur Abdıeva jáne basqa da estrada juldyzdary án shyrqady. «Jastar» teatrynyń akterleri kórermenderdiń nazaryna «Uly dalanyń jeti qyry» teatrlandyrylǵan qoıylymyn usynsa, «Sparta-Nomad Astana» komandasy qaýymǵa kóterińki kóńil-kúı syılady. Merekelik keshti Astana qalasynyń Mádenıet jáne sport basqarmasy uıymdastyrdy. Aıta keteıik, «Elorda juldyzy» syılyǵy endi jyl saıyn tabystalatyn bolady.
Baǵashar TURSYNBAIULY,
«Egemen Qazaqstan»
