Kolledjdiń júz jyldyq mereıtoıyna oraı «О́tkeni – tarıh, búgini – kemel, bolashaǵy – jarqyn!» taqyrybynda saltanatty kesh ótip, Másimhan Beısebaevqa músini ashyldy. Mereıtoı qonaqtary zamanaýı jabdyqtalǵan kolledj aýdıtorııalaryn aralap, búgingi tynys-tirshiligimen tanysty.
Saltanatty jıynda sóz alǵan Talǵar aýdanynyń ákimi Ryskeldi Satbaev, Almaty oblysynyń Bilim salasyndaǵy baqylaý departamentiniń basshysy Saltanat Dosmatova, Almaty oblysy Bilim basqarmasynyń basshysynyń orynbasary Gúlsara Isaǵulova kolledjdiń bilim berý salasyndaǵy atqaryp jatqan súbeli isterine baǵa berip, kolledj ustazdaryna Alǵys hat tabys etti.
Kolledj dırektory, ekonomıka ǵylymdarynyń kandıdaty, professor, Ulttyq Mashına jasaý jáne kólik ǵylym Akademııasynyń akademıgi Jaqsylyq Satylǵanovtyń aıtýynsha, ǵasyrlyq tarıhy bar bilim ordasy 1918 jyly qazan aıynda Vernyı qalasynda keń profıldi agronomdar daıyndaıtyn Jetisý orta aýylsharýashylyq ýchılıshesi bolyp qurylǵan ári eń alǵash 22 tálimger qabyldanǵan kolledj 100 jyldyq tarıhynda aýyl sharýashylyq salasyna otyz myńnan astam mamandar daıarlaǵan. Osy oraıda eńbek joly kolledj tarıhymen tikeleı baılanysty tulǵalardyń esimderin aıta ketken abzal.
Uly Otan Soǵysynyń ardageri, 1933-1936 jyldary osy tehnıkýmnyń dırektory, Qazaq KSR-i Mınıstrler Keńesiniń tóraǵasy qyzmetin atqarǵan Másimhan Beısebaevtan bastap, Uly Otan Soǵysynyń ardageri, tarıhshy, tarıh ǵylymdarynyń doktory, UǴA vıse-prezıdenti, 1932-1933 jyldarda Almaty aýylsharýashylyq tehnıkýmynyń dırektory bolǵan Aqaı Núsipbekov, Jetisý óńirindegi aýylsharýashylyq aýdandarynyń qalyptasýy men damýyna eleýli úles qosqan qoǵam qaıratkeri , oblystyq Ardagerler Keńesiniń tóraǵasy bolǵan Zamanbek Battalhanov, Uly Otan Soǵysynyń ardageri, III dárejeli Dańq ordeniniń ıegeri Ahmet Qaldybaev, VASHNIIL akademıgi, Sosıalıstik Eńbek Eri Qasym Asanov, Sosıalıstik Eńbek Erleri: Qapız Ábdiǵulov, Jolseıit Moldasanov, Ydyrys Ábdiǵulov jáne Sergeı Býrdınniń esimi respýblıka jurtshylyǵyna tanymal desek, Ydyrys Súleımenov, Syrym Qasymov, Tursyn Qalmaqbaev, Beıbit Erýbaev, Vladıslav Kýharskıı, Andreı Kýharskıı, Vladımır Gabrılıan, Mamed Mahmýtov, Marııa Andarjanova, Aleksandr Volchek, Tatıana Krıajeva, Qarlyǵash Sarmanova, Gúlnar Qańtarbaeva, Adaıbek Toǵabaev, Erǵalı Magrýpov, Naılıa Úmbetova, Jarylkasym Shakıev, Laýra Rahmankýlova syndy tulǵalardyń eńbegi óz aldyna maqtanysh týǵyzady.
Talǵar agrobıznes jáne menedjment kolledji elimizdiń eń baıyrǵy oqý orny retinde Qazaqstannyń Gınnes rekordtar kitabyna engen. Agroónekásip keshenine mamandardy daıyndaýdaǵy úlesi úshin Reseıdiń M.Lomonosov ordenimen marapattalǵan. «Nur Otan» partııasy tarapynan QR tehnıkalyq jáne kásiptik bilim berý júıesiniń 70 jyldyq mereıtoıyna oraı «Agrarly ónerkásip keshenin damytý» nomınasııasynyń jáne «Y.Altynsarın atyndaǵy QR bilim berý qyzmetkeleriniń Birlestigi» Respýblıkalyq qoǵam uıymynyń 2-shi, 2017 jyldyń Bilim berý kóshbasshysy atty 2-dárejeli, «Halyqaralyq ekologııa, ınjenerııa jáne pedagogıka ǵylym akademııasy» Qoǵamdyq qory atynan uıymdastyrylǵan «Bilim berý salasyndaǵy kóshbasshy -2017» ulttyq syılyqtarynyń ıegeri atanýy salaǵa qosqan kolledj ujymynyń zor jetistigi. Al Almaty oblystyq «Úzdik kásiptik bilim berý uıymy» baıqaýyndaǵy III dárejeli dıplomy, «Fermer-Fermerý» baǵdarlamasyn damytý boıynsha jobaǵa qosqan úlesi úshin Winrock International kompanııasynyń alǵys haty, bıylǵy jyly Almaty oblysynyń ákimi Amandyq Battalovtyń «Aýyl sharýashylyq mamandaryn daıarlaýdaǵy jetistikteri úshin aýylsharýashylyq salasynyń úzdik oqý orny» boıynsha Qurmet gramotasymen marapattalýy jáne taǵy basqa marapattary úzdiksiz izdenis pen eńbektiń jemisi.
Elvıra Serikqyzy,
«Egemen Qazaqstan»
ALMATY
