Qapshaǵaı qalasynyń Zarechnyı aýylynda ornalasqan «Mareven Fýd» zaýyty Jetisýdaǵy shetel ınvestısııasyna salynyp, ónim óndirýge kirisken biregeı óndiris. Zaýyt attas transulttyq kompanııa men Almaty oblysy ákimdiginiń áriptestigi aıasynda ashylǵan zaýytqa 15,4 mlrd teńge shetel ınvestısııasy tartyldy.
Aıtpaqshy, búgin ashylǵan jańa zaýyt Almaty oblysyndaǵy syrtqy ınvestısııaǵa salynǵan jalǵaz nysan emes. Qazir oblys boıynsha jalpy somasy 1,3 trln teńge bolatyn 50 iri ınvestısııalyq joba júzege asyrylýda. Onyń ishinde 32 joba tikeleı sheteldik kompanııalardyń qatysýymen bastalǵan. Jetisýǵa kelgen ınvestorlar qatarynda álemge áıgili «Koka-Kola», «Fýd Master», «Danon», «Efes», «Djı Tı Aı», «Tıkýrılla» sııaqty jıyrmadan astam brend kompanııalar bar.
«Mareven Fýd» brendi álem naryǵynda tamaq ónárkásibiniń alpaýyty retinde tanymal. Ásirese, jyldam daıyndalatyn kespe ónimderiniń negizgi úlesi osy transulttyq kompanııanyń enshisinde. Qazaqstanda tuńǵysh sanalatyn Qapshaǵaıdaǵy zaýytta da tanymal «Rollton» jáne «Bigbon» saýda belgisi aıasynda daıyn ónim shyǵaryla bastady. Qazirgi ýaqytta zaýyt 370 adamdy jumyspen qamtydy. Aldaǵy kúnderi jumys kúshi 523 adamǵa jetpek. Kompanııa óndiris ereksheligne oraı jergilikti jumysshylardy qaıta daıarlaýdan ótkizip, jańa tehnologııany meńgergen besaspap maman etip shyǵarmaqshy. Zaýyt óndirisiniń 3 bóligi iske qosylyp, ónim shyǵarýǵa kirisip ketti. Endigi qaptamasynda «Mareven Fýd» zaýytynda, Qazaqstanda óndiriligen» anyqtama jazýy bar «Rollton» kespesi men «Úı Rolltony» tuzdyǵy saýdaǵa shyǵyp úlgerdi.
- Jańa zaýyt jylyna 417 mln danaǵa deıin jyldam daıyndalatyn kespe ónimderin shyǵara alady. Bul «Qazaqstanda jasalǵan» belgisimen ishki jáne syrtqy naryqqa shyǵarylatyn ónim túri bolmaq. Qazir otandyq naryqqa 50 prosentke, syrtqy naryqqa 50 prosentke jumys jasamaqpyz. Buıyrsa, Qapshadaıda jasalǵan kespe elimizdiń barlyq aımaǵynan bólek, Ortalyq Azııa, Qytaı, Iran, Aýǵanstan, Mońǵolııa memleketterine eksporttalady, - deıdi «Mareven Fýd» zaýytynyń dırektory Aleksandr Vıaznıkov.
Qalmahanbet MUQAMETQALI,
«Egemen Qazaqstan»
Almaty oblysy
