Nıkolas ORTEGA «Nıý-Iork Taıms»
Keıd METS, «Nıý-Iork Taıms»
«Sahnada áıel pıanınonyń aldyna otyrdy. Ol ...»
a) sińlisi qýyrshaqpen oınap jatqanda jaǵaǵa jaıǵasa ketti.
á) mýzyka oınaı bastaǵanda bireýmen birge jymıdy.
b) toptyń ortasynda bıshilerge qarady.
v) tolqyǵan kúıi saýsaqtaryn pernege qoıdy.
Siz úshin bul ońaı suraq. Alaıda kompıýterdiń durys jaýapty tabýy qıynǵa soǵady. Ádette adamdardyń 88 paıyzdan astamy osy saýalǵa durys jaýap berse, jasandy ıntellekt júıesi 60 paıyzǵa dál tapty. Sarapshylar úshin bul tańǵalarlyq jetistik.
Eki aı ótkennen keıin Google kompanııasynyń zertteýshilerinen quralǵan top Bert dep atalatyn júıe oılap shyǵardy. Onyń jetilgen tehnologııasy joǵarǵydaı suraqtarǵa adam sekildi dál jaýap beredi. Júıe negizi mundaı synaqtan ótý úshin ázirlenbegen.
Bert-tiń iske qosylýy jasandy ıntellekt júıesine úlken serpin ákeldi. Keıingi birneshe aıda zertteýshiler kompıýter júıesiniń tilge tán ózindik erekshelikterdi meńgerip, ony basqa tapsyrmalardy oryndaýǵa qoldana alatynyn anyqtady.
Mundaı júıeler Alexa nemese Google Home sekildi sıfrly kómekshilerde qoldanylatyn túrli tehnologııalardy, zań fırmalary men basqa da kásipkerlerdiń qujattaryn ózdiginen saraptaıtyn baǵdarlamalardy damytady.
«Bizdiń adamzat deńgeıine jeteǵabyl jańa zat jasap shyǵarýymyz jumysty avtomattandyrady ári jeńildetedi», deıdi Djeremı Hovard. Ol – San-Fransıskoda oryn tepken Fast.ai zerthanasynyń negizin qalaýshy.
Bálkim, mundaı qadamdar aqyr sońynda áńgime-dúken quratyn tehnologııa jasap shyǵarýǵa kómekteser.
Biraq Hovard myrzanyń aıtýynsha, áleýmettik jelilerde mundaı júıeler áńgimelesýshini ózin adam ekenine sendiretindeı bottar jasaýǵa ákep soǵýy yqtımal.
Zertteýshilerdiń aıtýynsha, jasandy ıntellekt tásiliniń qarqyndy damýy shynaıy sekildi kórinetin jalǵan sýretter jasaýǵa múmkindik beredi. Hovard myrza mundaı tehnologııa til máselesine dendep engen saıyn, olardyń onlaın nusqasynyń shyǵýyna skeptıkalyq kózqaraspen qaraý qajettigin aıtady.
Mundaı jańa tildik júıeler adamdar jazǵan mıllıondaǵan sóılemdi saraptaı alady. San-Fransıskodaǵy OpenAI zerthanasy jasaǵan júıe myńdaǵan kitapty oqyp shyǵady. Google-dyń Bert tehnologııasy solardyń bárimen birge, Ýıkıpedııadaǵy búkil aqparatqa qanyq boldy.
Ár júıe naqty bir tásildi damytyp shyǵarady. OpenAI-dyń tehnologııasy sóılemdegi kelesi sózdi anyqtaýdy meńgerdi. Bert sóılemde túsip qalǵan sózdi dál tabýdy úırendi. Oǵan qosa, berilgen tapsyrmalardy oryndaı otyra olar tildiń qalaı qurylatynynan da habardar bola tústi.
Bert-tiń jasalýyna atsalysqan Google-dyń zertteýshisi Iаkob Devlınniń sózine qaraǵanda, eger júıe mıllıondaǵan sóılemnen túsip qalǵan sózdi dál taba bilse, onda ol aǵylshyn tilindegi sózderdiń negizgi baılanysyn jaqsy túsinedi.
«Mundaı tehnologııa jasandy ıntellektiń negizgi maqsatyna jasalǵan alǵashqy qadam. Onyń qatarynda kóp, túsiniksiz aqparattyń ishinen adamǵa qajettisin taýyp, mańyzdy sheshim qabyldaýǵa kómektesetin, saraptaıtyn tehnologııa jasap shyǵý bar», deıdi Nıý-Iork ýnıversıtetiniń professory Sem Boýman.
О́tken aıda Google Bert júıesin kópshiliktiń paıdalanýyna usyndy. Soǵan saı, oǵan qosymsha tapsyrma berýge bolady. Devlın myrza men onyń áriptesteri Bert-ti 102-ge jýyq tilde synap kórdi.
Alaıda mundaı júıeniń jedel damyp ketýine kúmánmen qaraıtyndar da bar. О́ıtkeni zertteýshiler jasandy ıntellekt oryndaı alatyn tapsyrmalarǵa ǵana nazar aýdaryp, basqasyn nazardan tys qaldyratynyn aıtady Nıý-Iork ýnıversıtetiniń psıhologııa professory Garı Markýs. «Mundaı júıeler óz maqsatyna tolyqqandy jetti deý úshin áli kóp eńbek etý kerek», deıdi ol.
© 2018 The New York Times News Service
Maqalany aýdarǵan Abaı ASANKELDIULY,
«Egemen Qazaqstan»
