Jyl basynan beri jańasha bilim berýge kirisken almatylyq muǵalimderdiń 70%-nyń jalaqysy 30 paıyzǵa kóbeıgen. Al qyrkúıekten bastap ulttyq kásibı testileýdi eńsergen 1293 ustaz alǵash ret ózderiniń qyzmettik eńbekaqysyna 30-dan 50 paıyzǵa deıin qosymsha aqy alatyn bolady. Bul týraly qalanyń pedagogtar qaýymymen kezdesken shahar basshysy Baýyrjan Baıbek aıtty. Ásirese fızıka, hımııa, ınformatıka pánderin aǵylshyn tilinde oqytatyn mamandarǵa aıryqsha jaǵdaı jasaý kózdelgen. Mundaı muǵalimderdiń qyzmettik jalaqylaryna qosa 200%-dyq kólemde qosymsha aqy tólenedi.
Qalanyń úzdik pedagogtarymen kezdesken qala ákimi Memleket basshysynyń Joldaýyn júzege asyrý aıasynda Bilim jáne ǵylym mınıstrliginiń «Pedagog mártebesi týraly» jáne «Oqýshy men muǵalimniń júktemesin azaıtý boıynsha birqatar zań aktilerine ózgerister men qosymshalar engizý týraly» zańdardyń jobalaryn daıyndaǵanyn atap ótti. Onyń sózinshe, qaladaǵy barlyq ustazdar men ata-analar qaýymdastyǵynyń ókilderi atalǵan zańdy talqylaýǵa belsendi túrde qatysýy kerek.
«Eń mańyzdysy, jobadan qazaqstandyq pedagogter óz jumystarynyń joǵary baǵaǵa ıe ekenin, bilim salasynda týyndaǵan barlyq máselege, oqýshylar men muǵalimderge aıryqsha nazar aýdarylatynyn kórdi. Sizderdiń qalanyń bilim salasyn damytýǵa qosqan úlesterińiz óte joǵary, jaýapty ári qıyndyǵy mol ustazdyq qyzmetterińizge alǵys aıtamyn. Oqýshylardyń túrli bilim saıystarynda bıik jetistikterge jetýi jeke kásibı biliktilikterińizdiń sapasyn aıqyndaı túsedi», dedi B.Baıbek.
Almaty qalasynyń bilim berý júıesinde 1078 bilim berý uıymy jumys istese, sonyń 700-den astamy mektepke deıingi bilim berý mekemesi. Máselen, sońǵy eki jyldyń ózinde qalada 10,4 myń adamǵa arnalǵan 262 mektepke deıingi mekeme ashylǵan. Búginde mektepke deıingi bilim berý jáne tárbıeleý isimen qaladaǵy úsh jastan alty jasqa deıingi jetkinshekterdiń 81,2 paıyzy qamtylyp otyr. Mektepter men mektepten tys uıymdarda iske qosylǵan robottehnıka jáne 3D modeldeý úıirmelerinde 3 myńnan astam shákirt bilim alady.
Arman OKTIаBR,
«Egemen Qazaqstan»
ALMATY
