Aıta ketý kerek, buǵan deıin Almaty qalasynda ústimizdegi jyldyń sáýirinde QR Memlekettik qyzmet isteri jáne sybaılas jemqorlyqqa qarsy is-qımyl Agenttiginiń Almaty qalasy boıynsha Departamenti men Ál-Farabı atyndaǵy Qazaq ulttyq ýnıversıtetimen birige otyryp «Sanaly urpaq» jobasy ashylǵan bolatyn. Endi bul joba elimizdiń ózge de aımaqtarynda jalǵasyn taýyp keledi degen Saıan Qylyshuly, ýnıversıtet ákimshiligin, professorlyq-oqytýshylyq quramyn jáne stýdent jastardy jobalyq keńse jumysyna barynsha qoldaý kórsetýge, Elbasymyzdyń alǵa qoıǵan basymdyqtaryn júzege asyrý sheńberinde bir judyryqtaı jumylýǵa shaqyrdy.
Sonymen qatar, joǵarǵy oqý ornynda «Adaldyq dúkeni» saltanatty túrde ashyldy.
«Adaldyq dúkeni» jumysy ózine-ózi qyzmet kórsetý júıesi boıynsha uıymdastyrylǵan. Munda oqytýshylar men stýdentter ózderine qajetti zattardy alyp, alynǵan taýar úshin aqshany kassalyq jáshikke qaldyryp, esep aıyrysady. Iаǵnı, dúkende satýshy joq, zatty satyp alýshylar óz-ózderine qyzmet kórsetetin bolady. Mundaı dúkenderdi engizý jastardyń jaǵymdy moraldyq qasıetterin, sonyń ishinde ishki parasattylyq pen adaldyqty tárbıeleýge baǵyttalǵan.
Atalmysh joba qoǵamda senim atmosferasyn birtindep qurady jáne stýdent jastarǵa ózin jaqsy, adal adam retinde anyqtaýǵa múmkindik beretinine senim mol. Ashylý saltanatyna qatysqan stýdentter mundaı dúkenniń ashylýyna tańdanystaryn jetkizip, jastarǵa bildirilgen senim úshin agenttiktiń aýmaqtyq departamenti jáne ýnıversıtet ujymyna rızashylyqtaryn jetkizdi.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
