Aıtýly sharaǵa Kenjehan Matyjanov, Ábsattar Derbisáli, Ýálıhan Qalıjan, Jańǵara Dádebaı, Temirhan Tebegenov, Jumabaı Shashtaıuly jáne taǵy basqa qazaqtyń kórnekti ǵalymdary men jazýshylary qatysyp, Aıgúl Isimaqovanyń ǵylym jolyndaǵy izdenisi men talpynysy, osy baǵytta atqarǵan jumystary, qaıratkerligi men shyǵarmashylyǵy jaıynda keńinen áńgime qozǵady.
Qarymdy qalamger, fılologııa ǵylymdarynyń doktory Ýálıhan Qalıjan Aıgúl Muhammedserikqyzynyń Alash taqyrybyna úlken daıyndyqpen kelip, kóptegen qundy eńbekter jazǵanyn tilge tıek etse, shyǵystanýshy, dintanýshy, ádebıet zertteýshisi, fılologııa ǵylymdarynyń doktory Ábsattar Derbisáli onyń kemelene kelgen ǵalym ekenin atap ótti.
Muhtar Áýezov atyndaǵy Ádebıet jáne óner ınstıtýtynyń bas ǵylymı qyzmetkeri, Qazaqstan Jazýshylar odaǵynyń múshesi Aıgúl Isimaqova jaıynda aıtar bolsaq, ol «Alash ádebıettanýy», «Asyl sózdiń teorııasy», «Táýelsizdik jáne Alash ǵylymy», «Alash ǵylymy jáne Táýelsizdik», «Jazǵan sóz janym ashyp Alashyma...», «Qazaq ádebıettanýyndaǵy táýelsizdik ıdeıasy», «Qazirgi ádebıettanýdyń teorııalyq máseleleri», «Qazirgi ádebıet pen ádebıetti zertteıtin qaýym», «Qazaq ádebıettanýy», «Táýelsizdik kezeńindegi ádebıettaný» jáne ózge de tilderde jazǵan birneshe ǵylymı monografııalardyń avtory, Amerıka bıografııa ınstıtýtynyń «Ǵylym adamy – 2004» syılyǵy jáne Ahmet Baıtursynuly atyndaǵy «Sańlaq avtor» medaliniń ıegeri.
Ádebıettanýshy A.Isimaqovanyń «Alash ádebıettanýy» atty eńbegi HH ǵasyrdyń basyndaǵy Alash ádebıeti men qazaq ádebıettaný ǵylymynyń ulttyq kórkemsóz ónerin zerdeleýge arnalǵan. Onda qazaqtyń asyl sózin qasterlegen ata-baba muralary qaı kezden bastalǵandyǵy, Alash ádebıettaný uǵymynyń qalaı qalyptasqandyǵy jóninde týyndaıtyn sansyz saýaldarǵa naqty jaýaptar berilgen. Sonymen qatar, kitapta Alash ǵalymdarynyń jalpy ǵylymǵa qandaı úles qosqandyǵy jáne Alash ǵylymı murasy nesimen qundy ekendigi jan-jaqty taldanady.
Ǵalym SÚLEIMEN,
«Egemen Qazaqstan».
ALMATY
