– Bıýdjettiń jalpy kóleminen 30,3% áleýmettik sala shyǵyndaryna baǵyttalady. Atalǵan baǵyt boıynsha absolıýtti maǵynada shyǵystar 52,2 mlrd teńgeni quraıdy, – dep málimdedi oblystyq qarjy basqarmasy jetekshisiniń orynbasary Lıýdmıla Basharına.
Áleýmettik shyǵyndardyń basym bóligi bilim salasyna bólindi, ol 23 mlrd teńgeni qurady. Densaýlyq saqtaý salasyna 7,3 mlrd teńge qarastyrylǵan. Bilim jáne densaýlyq saqtaý nysandaryn jóndeýge jáne olardyń materıaldyq-tehnıkalyq bazasyn jańartýǵa oblystyq bıýdjetten 6,2 mlrd teńge bólindi. Sportty damytýǵa 10,3 mlrd teńge baǵyttaldy. Áleýmettik kómek jáne oblys halqyn áleýmettik qorǵaý úshin 6,2 mlrd teńge qarastyrylǵan.
– Naqty sektor shyǵyndary 2019 jyly 22,9 mlrd teńgeni quraıdy. Olardan oblys joldaryn aǵymdaǵy, ortasha jáne kúrdeli jóndeýge 9,8 mlrd teńge, agroónerkásip keshenin damytý baǵdarlamasyna 4,2 mlrd teńge, turǵyn úı-kommýnaldyq sharýashylyqty damytýǵa 2,1 mlrd teńge, kásipkerlikti qoldaýǵa jáne damytýǵa 1,9 mlrd teńge bólý josparlandy, – dep málimdedi Lıýdmıla Basharına.
600 mln teńge tabıǵatty qorǵaý jáne kóktemgi sý tasqynyna qarsy sharalarǵa qarastyrylǵan. 7,7 mlrd teńge bilim, densaýlyq saqtaý, mádenıet, sport, sondaı-aq turǵyn úı qurylysyna baǵyttalady dep josparlandy.
Oblys ákimi Erlan Qoshanov bıýdjettiń teńdestirilgenin atap ótti.
– Bekitilgen bıýdjet Memleket basshysynyń barlyq tapsyrmalaryn júzege asyrdy tolyqtaı qarjylandyrýdy kózdeıdi, – dedi ol. – Mysaly, «7-20-25» baǵdarlamasyna qatysýshylardy yntalandyrý jáne olardyń sanyn arttyrý úshin biz jalpy somasy 1 mlrd teńgeni quraıtyn turǵyn úı sertıfıkattaryn qarjylandyramyz. Sondaı-aq, qosymsha qarjy qajet bolǵan jaǵdaıda, biz bıýdjetti naqtylaý kezinde bul máseleni depýtattarmen birlesip sheshe alamyz.
Qaraǵandyda balalar jáne jasóspirimder saraıy men 50 metrlik júzý basseıniniń qurylysyna 3 mlrd teńge josparlanǵan. Bul áleýmettik nysandardy salý týraly tapsyrmany Elbasy osy jyldyń qyrkúıek aıynda oblysqa jasaǵan sapary barysynda bergen bolatyn.
Sessııada oblys ákimi Erlan Qoshanov Elbasynyń 2019 jyldy «Jastar jyly» dep jarııalaýyna baılanysty aımaqta IT, aýyl jastary, jas jazýshylar forýmy jáne basqa da sharalardy ótkizý josparlanyp otyrǵanyn habardar etti.
Qaırat ÁBILDA,
«Egemen Qazaqstan»
Qaraǵandy
