Qytaılyq iri ınvestorlar kelisimniń artynsha «SaryarqaAvtoProm» mashına jasaý zaýyty ornalasqan Qostanaı qalasyna kelip, óndiristi aralap kórdi. Odan keıin oblys ákimi Arhımed Muhambetovpen eki jaqty kezdesý ótti.
Arhımed Muhambetov qytaılyq ınvestorlarǵa oblys óndirisi týraly aıtyp berdi.
«Bıyl byltyrǵydan edáýir kóp ónim óndirildi. Al 2016 jylmen salystyrǵanda zaýyttan shyǵarylǵan avtomobıldiń sany alty ese kóp. Aldaǵy ýaqytta da qytaılyq ınvesstorlarmen birlesip, eksport baǵytyndaǵy tehnıkalar óndiremiz. Al negizgi maqsat mashına jasaý isinde jumystyń 50 prosentine deıin jergilikti jerde atqarýǵa qol jetkizý bolyp tabylady» dedi Arhımed Begejanuly.
Oblys ákimi munan keıin qonaqtarǵa Qostanaı qalasynda salynyp jatqan óndiristik aımaqty tanystyryp ótti. Onda qazir quny 300 mıllıard teńge bolatyn 11 ınvestısııalyq joba júzege asyrylyp jatyr. Olardyń arasynda qytaılyq ınvestorlardyń qatysýymen júzege asatyn jobalar da bar.
Munan keıin Genertec (China General Technology Group) kompanııasy basqarma tóraǵasy Lý Iımın joba eki eldiń ekonomıkasyna da oń áseri bolatynyn jáne «Jibek jolynyń ekonomıkalyq beldeýi» baǵdarlamasynyń mańyzdy bóligi bolyp tabylatynyn aıtty. Lý Iımın myrza eki elge ortaq joba sheńberinde atqarylatyn jumystar men mashına óndirisiniń sapasy úshin ınvestor tarapynan barlyq múmkindikter, onyń ishinde ozyq tehnologııalar engiziletinine mańyz berdi.
Názıra Járimbet,
«Egemen Qazaqstan»
Qostanaı
