Patrýldik polısııa qyzmetkerleri 80 myń teńgeniń ornyna 120 myń teńge alatyn bolady jáne oblys ákiminiń qoldaýymen kelesi jyldan bastap, barlyq serjanttar ofıserlik laýazymǵa aýystyrylyp, jalaqylary 80-nen 150 myń teńgege deıin ósetin bolady, dep habarlady Mańǵystaý oblystyq Polısııa departamentiniń basshysy.
Buryn jedel tergeý bólinisteriniń qyzmetine tólenip kelgen turǵyn úı ústemaqysy kelesi jyldan bastap barlyq qyzmetkerlerge tólenip, optımızasııa jumystary aıaqtalǵannan keıin, 2019 jyldyń qańtarynan bastap, barlyq polısııa qyzmetkerleri qaıta attestattaýdan ótkizilip, qyzmetti tek eń myqty polıseıler jalǵastyratyn bolady.
Sondaı-aq, polısııa qyzmetin jaqsartý maqsatynda Elbasynyń tapsyrmasyna sáıkes, qoǵamǵa jańa úlgidegi polısııa kıimderi usynyldy. Jańa úlgidegi kıimderdi daıyndaý barysynda elimizdiń klımattyq jaǵdaılary eskerilgen.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
