Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Oljas Bektenov sybaılas jemqorlyqqa qarsy júıeli sharalar týraly baıandady. Ol memlekettik apparattyń kásibı sıpatqa kóshýimen qatar sheneýnikterdiń azamattarmen tikeleı baılanystary eleýli túrde qysqarǵanyn jáne sybaılas jemqorlyq kórinisterine qolaıly jaǵdaılar azaıǵanyn atap ótti.
Jalpy alǵanda, halyqqa qyzmet kórsetý ortalyqtary arqyly 83 paıyz qyzmet elektrondy túrde, onyń ishinde 63 paıyzy «elektrondy úkimet» portaly arqyly kórsetiledi. Málimetter bazasyn kiriktirý 2,5 ese ósip, 30 paıyzdy qurap otyr.
Aǵartýshylyq jumystary arqyly azamattyq qoǵamdy sybaılas jemqorlyqpen belsendi túrde kúreske tartý jáne onyń kez-kelgen kórinisterine tózbeýshilik ahýalyn qalyptastyrý júzege asýda.
O.Bektenov Astanda iske qosylǵan «Qoǵamdyq baqylaýdyń ınteraktıvtik kartasy» týraly senatorlarǵa aıtyp berdi. Ol qurylys, jóndeý jumystary men ınfraqurylymdar jáne áleýmettik nysandardy ustaý shyǵyndary týraly naqty ýaqyttaǵy derekterdi kórsete alady. Karta jergilikti bıýdjetti iske asyrýdy kórsetýge jáne baǵalaýǵa, saýaldar berý men shaǵymdar aıtýǵa, sondaı-aq keri baılanysqa shyǵýǵa múmkindik beredi.
Senator Muhtar Qul-Muhammed osy jobany elimizdiń barlyq aımaqtaryna keńinen taratýdy usyndy. Ony tıimdi iske asyrý úshin arnaıy baǵdarlama ázirlep, birneshe satyǵa bólý kerektigi aıtyldy.
Halyqtyń keń jolaqty ınternetke qol jetkizýin qamtamasyz etýge arnalǵan bıýdjet qarjysyn tıimdi jumsaý máselelerine baılanysty qyzý pikirsaıys óristedi. Senator Talǵat Musabaevtyń pikirinshe, ol úshin talshyqty-optıkalyq qymbat baılanys jelisin emes, KazSat-2 jáne KazSat-3 jer serikterin paıdalaný oryndy bolar edi.
Halyqaralyq qatynastar, qorǵanys jáne qaýipsizdik komıtetiniń tóraǵasy Darıǵa Nazarbaeva «Sıfrly Qazaqstan» baǵdarlamasyna bólingen qarjyny jumsaý boıynsha qoǵamdyq monıtorıng júıesin jasaýdy usyndy.
Senatorlar memlekettik organdardaǵy, onyń ishinde IIM júıesi, salyq qyzmeti, keden, kólik salasyndaǵy sybaılas jemqorlyq derekterine alańdaýshylyq bildirdi.
Senator D.Nazarbaevanyń pikirinshe, birinshi kezekte quqyq qorǵaý organdary óz ishindegi sybaılas jemqorlyqpen kúresýileri tıis. Sondaı-aq memlekettik organdardaǵy ózara baqylaý júıesin qurý jáne zańnamalyq aktilerge sybaılas jemqorlyq turǵysynda júıeli taldaý jasaý kerek.
