Bıylǵy jyldyń ózinde ǵana oblys ákimi Málik Myrzalınniń jandy qamqorlyǵynyń arqasynda qalyń oqyrman qaýymnyń rýhanı mándi azyǵyna aınalatyn birqatar týyndylar jaryq kórip, kópshiliktiń qolyna tıdi. Uly dalanyń ulaǵatty perzenti, Keńes Odaǵynyń Batyry Málik Ǵabdýllınniń 11 tomdyǵy men jazýshy-pýblısıst, Qazaqstan Respýblıkasynyń eńbek sińirgen qaıratkeri Jabal Erǵalıevtiń Elbasy Nursultan Nazarbaevtyń qaıratkerlik tulǵasyn ashyp kórsetetin «Álemge! Ǵaryshqa! Bolashaqqa jol ashqan Tuńǵysh!» jınaǵy, professor Qadyrjan Ábýovtyń óńirimizdegi tarıhı tulǵalar týraly bıblıografııalyq ocherkteri jaryq kórgen bolatyn.
–Jerlesimiz, talantty jazýshy Sáken Júnisovtiń «Zamanaı men Amanaı» povesi Londonda jaryq kórdi,–dedi tusaýkeserdi ashyp júrgizip otyrǵan oblys ákimi Málik Myrzalın,–biz búgin ótkenimizdiń óreli isteri men kemel keleshegimizdi qaýzaıtyn jaqsy isterdi jalǵastyrýdamyz.
El táýelsizdiginiń qarsańynda qazaq, orys jáne aǵylshyn tilderinde jaryq kórgen jınaq qasıetti óńirdegi kóneniń kómbesin aqtaryp, el júreginde qalǵan tarıhı tulǵalardyń týǵan eline sińirgen qısapsyz eńbegin sıpattaıdy. Táýelsizdik jyldaryndaǵy oblystyń áleýmettik-ekonomıkalyq damýy, teńdesi joq tabıǵı baılyǵy, ekonomıkasynyń eńse kóterýi, sondaı-aq rýhanı áleminiń kemeldenip, kórkeıe túsýi ári oǵan sony serpin bergen «Rýhanı jańǵyrý» baǵdarlamasynyń baıyppen júzege asýy qamtylyp otyr. Bezendirilýi de talaıǵa tańdaı qaqtyratyndaı. Almaty qalasyndaǵy «Altyn kitap» baspasynan shyqqan jınaq aldaǵy ýaqytta kitaphanalar men bilim oshaqtaryna taratylmaq.
Tusaýkeser barysynda «Altyn kitap» baspasynyń dırektory Vıacheslav Tıtenev, jazýshy-aýdarmashy Ǵosman Tóleǵul, oblystyq tarıhı ólketaný mýzeıi dırektorynyń orynbasary Alma Qunanbaeva, Aqmola oblysynyń qurmetti azamaty Saǵyntaı Elýbaevtar áli sııasy keppegen jınaqtyń qundylyǵyn aıtyp, joǵary baǵa berdi.
Baıqal BAIÁDIL,
«Egemen Qazaqstan»
Aqmola oblysy
