Ulttyq qundylyqtardy dáripteýge arnalǵan jıynda Orazkúl Asanǵazy qatysýshylardy Táýelsizdik kúnimen quttyqtady. Sondaı-aq Memleket basshysynyń «Biz 27 jylda qazaqty álemge pash etip, kórikti Astana qalasyn qurdyq. Endi mine bıyldan bastap qazaqtyń tól álipbıin jasaımyz» degen sózine toqtaldy. «Elbasynyń baǵdarlamalyq maqalalary memlekettik deńgeıde talqylanyp, ondaǵy ıgi bastamalar júzege asyp jatyr. Bul maqala áýeli bolashaq urpaq úshin mańyzdy. Biz bala, ata-ana jáne ustaz arasyn jalǵaıtyn «Ulaǵat uıasy» atty ata-ana mektebin ashyp, oqýshylardyń boıyna rýhanı qundylyqtar men ana tiliniń mán-mańyzyn sińirip kelemiz. Ár bala Memleket basshysynyń maqalasyn oqı otyryp, bolashaqqa baǵdar alýy tıis», dedi ol. Sondaı-aq O.Asanǵazy «Bolashaqqa baǵdar: Rýhanı jańǵyrý» maqalasynda jazylǵan ulttyq kod, ulttyq mádenıet, ulttyq bolmystyń mańyzdylyǵyn atap ótip, olardy júıeli túrde taldady.
О́z kezeginde sóz alǵan «Egemen Qazaqstan» gazetiniń basqarma tóraǵasy Darhan Qydyráli ulttyq sanany jańǵyrtýda kitap pen gazet oqýdyń mańyzy erekshe ekenin atap ótti. Onyń aıtýynsha, eldiń rýhanı jańǵyrýy eń aldymen bala tárbıesinen bastalady. Sondaı-aq D.Qydyráli Elbasynyń «Uly dalanyń jeti qyry» maqalasynda jazylǵan jylqyny qolǵa úıretý, ań stıli, uly daladaǵy ejelgi metallýrgııa jáne uly esimderdiń mańyzyn jas urpaqqa túsindirdi.
Budan ári oqýshylar men ata-analar qoǵam qaıratkerlerine suraq qoıyp, kókeıde júrgen saýaldaryna jaýap aldy. Jıyn sońynda «Daryn» lıseıiniń dırektory Jamal Qasymbek qatysýshylarǵa rızashylyǵyn bildirdi.
Marjan TILEÝBEK,
«Egemen Qazaqstan»
