Nursultan Nazarbaevtyń atyna Qazaqstan Respýblıkasynyń Táýelsizdik kúnine oraı shet memleketterdiń basshylarynan quttyqtaý jedelhattary men hattar kelip tústi.
Amerıka Qurama Shtattarynyń Prezıdenti jeke óziniń jáne barsha Amerıka halqynyń atynan Qazaqstan halqyn Táýelsizdiktiń 27 jyldyǵymen quttyqtady.
«AQSh Qazaqstannyń táýelsizdigin 1991 jyly alǵash ret moıyndaǵan ýaqyttan beri elderimiz únemi ekijaqty baılanystardy nyǵaıtý jolynda jumys júrgizip keledi. Sizdiń bıylǵy qańtardaǵy Vashıngtonǵa saparyńyz osy jyldar ishinde elderimiz arasynda qalyptasqan qarym-qatynastarymyzdy ilgeriletýge jáne nyǵaıtýǵa tyń serpin berdi», – delingen jedelhatta.
Donald Tramp Nursultan Nazarbaevtyń basshylyq etýimen Qazaqstannyń ıadrolyq qarýdy taratpaý isiniń kóshbasshysyna jáne beıbit ómirdiń jaqtaýshysyna aınalǵanyn atap ótken.
«Men berik yntymaqtas-
tyǵymyz aldaǵy ýaqytta da jalǵasa beredi dep oılaımyn. Sizge jáne Qazaqstan halqyna kele jatqan Jańa jylda tabys pen baq-bereke tileımin!», – delingen AQSh Prezıdentiniń quttyqtaý hatynda.
Ulybrıtanııa Patshaıymy II Elızaveta Nursultan Nazarbaevty jáne Qazaqstan halqyn aldaǵy Táýelsizdik kúnimen quttyqtap, baq-bereke jáne tabys tiledi.
«Ulttyq merekelerińizge oraı kele jatqan jyly Qazaqstan halqyna amandyq pen baqyt tileı otyryp, zor iltıpatymdy jetkizgim keledi», – delingen jedelhatta.
Saýd Arabııasynyń Koroli Salman ben Ábdel Ázız Ál Saýd jáne Saýd Arabııasy Koroldiginiń taq murageri Muhammed ben Salman ben Ábdel Ázız Ál Saýd barsha Qazaqstan halqynyń ósip-órkendeı berýine tilektestik bildirip, barlyq saladaǵy ekijaqty yntymaqtastyqty odan ári nyǵaıtýǵa nıetti ekenin jetkizgen.
Rım Papasy Fransısk Nursultan Nazarbaevty Táýelsizdik kúnimen quttyqtap, búkil Qazaqstan halqyna beıbit ómir men baq-bereke tilegen jyly lebizin joldaǵan.
Marokko Koroli IV Muhammed óz jedelhatynda Qazaqstan men Marokko arasyndaǵy qarym-qatynastarǵa joǵary baǵa berip, eki memleket halyqtarynyń ıgiligi úshin yntymaqtastyqty nyǵaıtýǵa baǵyttalǵan jumystardy jalǵastyrýǵa nıetti ekenin bildirdi.
Sondaı-aq Kýba Respýblıkasy Memlekettik keńesiniń jáne Mınıstrler keńesiniń tóraǵasy Mıgel Dıas-Kanel Nursultan Nazarbaevty jáne Qazaqstan halqyn Táýelsizdik qúnimen quttyqtap, baq-bereke tilegen jedelhatyn joldady.
Túrikmenstan Prezıdenti Gýrbangýly Berdimuhamedov óziniń hatynda: «Qazaqstan táýelsizdik jyldarynda memlekettilikti nyǵaıtý, halyqtyń ál-aýqatyn jáne eldiń halyqaralyq arenadaǵy bedelin arttyrý jolynda zor jetistikterge qol jetkizdi. Túrikmenstan men Qazaqstannyń ekijaqty qatynastary joǵary deńgeıde ekeni qýantady. Bul elderimiz arasyndaǵy tabysty yntymaqtastyq pen ózara tyǵyz baılanystyń túrli baǵytta damyp kele jatqanyn kórsetedi», – dep atap ótken.
