Jyl basynda amerıkalyq ataqty menedjer Egıs Kılımaspen jumys isteı bastaǵan Qanat Islam bıyl jaz mezgilinde jekpe-jek ótkizýi tıis bolǵan, alaıda jattyǵý barysynda jaraqat alyp, kezdesýi keıinge shegerilgen edi. Otandyq BAQ ókilderine bergen suhbatynda Qanat Islam jaraqatynan tolyq aıyǵyp, jattyǵýǵa kiriskenin aıtady. «Jekpe-jek ótkizbegenime de bir jarym jylǵa taıap qaldy. Qazir jaraqatym tolyq jazylyp bitti, aqyryndap jattyǵýǵa kirisip jatyrmyn. Boıymda áli kúsh bar ekenin sezemin. Sondyqtan kareramdy aıaqtaýǵa áli erte dep oılaımyn. Jaraqattan aman bolsaq, kelesi jyldyń naýryz aıynda AQSh-ta jekpe-jek ótkizip, jankúıerlerimdi qýantpaqshymyn», deıdi Qanat Islam.
Aıta keteıik, Qanat Islam óziniń sońǵy jekpe-jegin 2017 jyldyń 9 qyrkúıeginde Astanadaǵy «Saryarqa» velotreginde ótkizip, kanadalyq boksshy Brendon Kýkty 9-raýndta tehnıkalyq nokaýtpen jeńgen bolatyn.
Álı BITО́RE,
«Egemen Qazaqstan»
