Amangeldi aýdandyq polısııa bóliminde mal urlyǵymen aınalysqan eki adamǵa qatysty qylmystyq is jatyr. Osy aýdanǵa qarasty Baıǵabyl aýylyndaǵy sharýa qojalyǵynyń 11 bas jylqysyn jaıylymda júrgen jerinen jumyssyz 37 jáne 46 jastaǵy eki adam aıdap alyp ketedi. Olardy polıseıler «Skotokrad» jedel-profılaktıkalyq shara kezinde anyqtap, ustady. Kúdiktiniń bireýi jylqylardy qarasha aıynda ózimen urlyqty birge jasap júrgen adamnyń qorasyna ákelip qamap qoıǵan. Ary qaraı áreketti ekeýi birge jasaǵan. Olar urlaǵan maldy soıyp, etin Astanaǵa aparyp satyp otyrǵan.
Jedel-profılaktıkalyq shara kezinde polıseıler kúdiktiniń biri soıylǵan jylqynyń eti men terisin úıine tyǵyp qoıǵan jerinen taýyp aldy. Polıseıler soıylǵan jylqynyń túr-túsi týraly sharýa qojalyǵyna habarlaıdy. Bir qyzyǵy, sharýa qojalyǵynyń jeetkshisi jylqylarynyń qoldy bolǵanyn polıseıden esitedi, ol malyn jaıylymda júr dep oılapty. Sharýa qojalyǵyna keltirilgen shyǵyn 3 mıllıon teńgeden asady.
Qazir QK 188-baby, 3-bólim, ıaǵnı «Urlyq» boıynsha sotqa deıingi tergeý amaldary júrip jatyr.
Qostanaı oblystyq Polısııa departamenti baspasóz qyzmetiniń málimetinshe, oblysta jyl basynan beri 243 bas mal urlanǵan, onyń ishinde 108 is ǵana ashyldy.
Názıra Járimbet,
«Egemen Qazaqstan»
Qostanaı
