Polısııa general-maıory Berik Bilálov oblystyq, qalalyq jáne aýdandyq máslıhattar depýtattarynyń aldynda osymen besinshi ret esep berdi. Mundaı kezdesýler jyldaǵy dástúrge aınalǵan. Sondaı-aq, polıseıler turǵyndardyń, qoǵamdyq uıymdardyń jáne BAQ ókilderiniń aldynda da esep beredi.
«Jumystyń zamanaýı jańa ashyq formaty vedomstvo qyzmetin budan da aıqyn etýge múmkindik berdi. Qoljetimdilikti jáne turǵyndardyń senim deńgeıin arttyrý úshin oblys polısııasynyń barlyq qurylymdary ózderiniń qyzmetin front-ofıster men mamandandyrylǵan ortalyqtar arqyly júzege asyratyn qyzmet kórsetýdiń servıstik modeline kóshti», dep atap ótildi jıynda.
Eseptik kezdesý aıasynda halyq qalaýlylary birqatar polısııa obektilerin aralady. Atap aıtqanda, kóshi-qon qyzmeti ortalyǵy, qalalyq polısııa basqarmasynyń front-ofısi, №10 ýchaskelik polısııa pýnkti, turǵylyqty meken-jaıy joq tulǵalarǵa arnalǵan túneý orny, atý tıri men polısııa vedomstvosynyń murajaıyna bardy. Qoǵamdyq tártipti saqtaý men azamattardyń qaýipsizdigin qamtamasyz etý boıynsha jumys tıimdiligin arttyrý úshin engizilgen beınebaqylaý júıesimen jáne basqa da ozyq tehnologııalarmen tanysty.
Mundaı taǵylymdy is-sharalardyń maqsaty polısııa departamentiniń ashyq úderisin qamtamasyz etý, jedel-qyzmettik jumys, materıaldyq-tehnıkalyq qamtamasyz etý, qarjylyq aıqyndylyǵy jaıly aqparattandyrý bolyp tabylady. О́ńirdegi krımınogendik ahýal, kósheler men aýlalardaǵy, oıyn-saýyq oryndaryndaǵy qoǵamdyq tártip, qaýipsizdik udaıy baqylaýda. Depýtattar oblystyq polısııa basshylyǵynyń aldaǵy jyldy «Esirtkisiz bolashaq» jyly dep jarııalaý jáne sıntetıkalyq esirtkige qarsy kúreste memlekettik organdar men múddeli vedomstvolardyń jumysyn úılestirý týraly sheshimin qoldady. Bul jumystar Elbasynyń 2019 jyldy Jastar jyly dep jarııalaýy týraly bastamasy aıasynda iske asyrylady.
О́mir ESQALI,
«Egemen Qazaqstan»
Soltústik Qazaqstan oblysy
