Aty aıtyp turǵandaı bastapqyda fotograf retinde tanylǵan Oleg Belıalovtyń jańa týyndysy qyzǵaldaqtyń tórkini bolǵan Qazaqstan týraly baıandaıdy. Fılm tamyry tereńge tartatyn erekshe gúlge arnalady.
– Tamasha fotograf Oleg Belıalovty kezinde rejısser bolýǵa kóndire alǵanyma qatty qýanam. Ol úshin bul mańyzdy sheshim boldy. Búgin mine, biz onyń fılmin tamashalaýǵa jınalyp otyrmyz, – dedi fılm bastalar aldynda sóz alǵan «Qazaqfılm» kınostýdııasynyń prezıdenti Baqyt Qaıyrbekov.
Sondaı-aq Baqyt Qaıyrbekov rejısserdiń birinshi týyndysy «Altynemel» Qytaıdyń Taıchjoý qalasynda ótken kıno men týrızm salasyndaǵy Azııa óneri aptalyǵynda úzdik shetel derekti fılmi atalymynda alǵan júldesin tabystady. Aıta ketelik, Oleg Belıalovty Qazaqstan kınematografıster odaǵy ulttyq «Qulager» premııasynda úzdik rejısser-dokýmentalıst dep tanyǵan bolatyn.
«Qyzǵaldaqtar atamekeni» fılminiń túsirilimderi Almaty, Jambyl, Túrkistan jáne Ortalyq Qazaqstan oblystarynda júrgen. Sonymen qatar, rejısserdiń aıtýy boıynsha, fılmde arhıvtik materıaldar qoldanylǵan.
– Kópshilik qyzǵaldaqty Gollandııamen baılanystyrady. Alaıda, bul gúldiń otany – Qazaqstan. Prezıdent Nursultan Nazarbaev «Uly dalanyń jeti qyry» atty maqalasynda qyzǵaldaq taqyrybyn qozǵaǵany meni qýantyp otyr. О́ıtkeni, bul gúlder bizdiń muramyz, maqtanyshymyz, brendimiz. Olardy qadirlep, qorǵaýymyz kerek, – dedi fılmniń ǵylymı keńesshisi Anna Ivashenko.
Aınash ESALI,
«Egemen Qazaqstan»
ALMATY
