Osy oraıda oblysta balamaly energııa kózderin kóptep ashý maqsatynda ınvestısııa tartý arqyly jańa jobalardy júzege asyrý josparlanýda.Mysaly, Túrkııa Respýblıkasynyń «Biotrend energy» kompanııasy maqta qaldyqtarynan elektr qýatyn óndiretin zaýyt salý týraly usynys jasap otyr. Irgetasy 2012 jyly qurylǵan kompanııa halyqaralyq standarttarǵa sáıkes taza qýat óndirýdi maqsat tutqan, energetıkalyq kásiporyn. Kompanııanyń basqarma tóraǵasy Mýrat Aslan bastap kelgen delegasııa Túrkistan oblysy ákiminiń birinshi orynbasary Qaırat Núkenovpen kezdesip, óz usynys-pikirlerin jetkizdi.
Kompanııanyń aýyl sharýashylyǵy ónimderin qaıta óńdeýde ozyq kásiporyn ekenin aıtyp, osy salada Túrkistan oblysyna ınvestısııa salýǵa nıetti ekenin bildirgen Mýrat Aslannyń aıtýynsha, 1 gektar maqta alqabynan 3 tonna maqta qaldyǵy shyqsa, odan 30-40 mVt elektr qýatyn óndirýge bolady eken. Maqta qaldyqtary men qoqystan polıetılen ónimderin jáne tabıǵı gaz shyǵarýǵa da bolady.
Osyny eskergen mamandar "aq altyndy" Shardara, Jetisaı jáne Maqtaaral aýdandarynda maqta qaldyǵyn qabyldap, ony óńdeıtin eki zaýyt salýdy josparlap otyr. Bul rette, delegasııa jetekshisi ákimdik tarapynan jer telimin bólip berý men qujattardy rásimdeý jaǵynan qajetti qoldaý kórsetýdi surady. Oblys ákiminiń birinshi orynbasary ınvestorlarǵa ákimdik tarapynan tıisti qoldaýlardyń kórsetiletinin jetkizdi.
Ǵalymjan ELShIBAI,
«Egemen Qazaqstan»
Túrkistan oblysy
