Batys Qazaqstan oblysy ortalyǵyndaǵy tarıhı ǵımarat – kezinde Jahansha Dosmuhameduly, Halel Dosmuhameduly, Sabyr Sarǵojın syndy Alash arystary oqyǵan Oral áskerı realdy ýchılıshesiniń úıinde búginde Jahansha Dosmuhamedov atyndaǵy pedagogıkalyq kolledj ornalasqan. Kolledjge osydan dál 20 jyl buryn Jahansha esimi berilgen bolatyn. Osy dataǵa oraı kolledjge Jahansha murasyn zertteýshi ǵalymdar jınalyp, stýdentter men ustazdar ujymy aldynda taǵylymdy shara ótti.
Osy kezdesýge ardager ólketanýshy Jaısań Aqbaı, Jahansha Dosmuhameduly atyndaǵy «Qaıratker» qoǵamdyq qorynyń dırektory, alashtanýshy ǵalym, tarıh ǵylymdarynyń kandıdaty Dámetken Súleımenova, tarıhshy ustaz Saılaý Súleımenov, Jahanshanyń zańgerlik jolyn zerttegen ǵalym, tarıh ǵylymdarynyń kandıdaty, zań dosenti, búginde Terekti aýdanynyń prokýrory bolyp qyzmet etip júrgen Ravıl Majıtov, tarıh ǵylymdarynyń kandıdaty, dosent Jańabek Jaqsyǵalıev pen Samat Qurmanálın, Batys Qazaqstan oblystyq tarıh jáne arheologııa ortalyǵynyń dırektory Jantas Safýllın, Jympıtydaǵy Alash mýzeıiniń dırektory Aınagúl Oıshybaeva, Qaratóbe aýdandyq tarıhı-ólketaný mýzeıiniń dırektory Nurlan Meńdeshev, Batys Qazaqstan oblystyq ádistemelik kabınet dırektory Aıagóz Hamzına, osy kolledjdi 1994-2017 jyldary basqarǵan ustaz, pedagogıka ǵylymdarynyń doktory, professor Shalqyma Qurmanalına, Qazaqstan Jazýshylar odaǵynyń múshesi, jazýshy Munaıdar Balmolda jáne basqalary qatysyp, Jahansha Dosmuhamedulynyń ómiri men qyzmetine, jalpy Alash qozǵalysy tarıhyna qatysty baıandamalaryn ortaǵa saldy.
Jantas Safýllın Jahanshanyń ómiriniń sońǵy kezeńinde Máskeýde turǵan úıdiń qalaı tabylǵanyn aıtyp, oǵan eskertkish taqta ornatý máselesin kóterse, Ravıl Májıtov Jahanshanyń ulttyq memlekettik qurylym týraly tyń derekke toly baıandama jasady.
Osy kúni kolledjde «Rýhanı mura» kabıneti ashylyp, tarıh pániniń oqytýshysy Álııa Júrekenova kolledj tarıhyn el tarıhymen toǵystyra tanystyryp shyqty. Aıta ketý kerek, kolledjdiń tarıhı ǵımaraty Alash rýhymen tynystap tur dese bolǵandaı. Mundaǵy ár kabınet, oqý zaldary, tipti dálizder men foıe Alash arystarynyń ómir joly men qyzmetinen habar beretin kórneki aqparatqa toly.
Shara aıasynda «Alash arystary beıneleý ónerinde» atty sýret baıqaýy uıymdastyryldy. Respýblıkalyq «Jyl muǵalimi-2017» baıqaýynyń jeńimpazy, sýretshi Nurlan Hamzınniń shákirtteri Alash qaıratkerleriniń beınesin qaǵazǵa túsirip, sheberlik kórsetti.
- Kolledj ıelenip otyrǵan Jahansha Dosmuhamedulynyń esimin jas urpaqtyń esinde qaldyrý, elge etken qyzmetin nasıhattaý maqsatynda birneshe shara oılastyrǵan bolatynbyz. Jaqynda «Jahansha izimen» atty tarıhı ekspedısııaǵa shyǵyp keldik. Kolledj stýdentteri men ustazdar toby Alash kóseminiń týǵan jeri – Buldyrty aýylynda, Jympıtydaǵy Alash tarıhy mýzeıinde bolyp, tarıhı topyraqpen tanysty. Mine, «Jahansha oqýlary» ótip jatyr. Bul kúni kolledjdegi ár top Alash tarıhyna qatysty shaǵyn qoıylymdar qoıdy. Birneshe seksııadan turatyn «Jahansha oqýlary» kezinde stýdentter kóptegen tyń málimetke qanyqty. Jekelegen demeýshilerdiń kómegimen kolledjdiń ozat, belsendi stýdentterine Jahansha atyndaǵy ataýly stıpendııa taǵaıyndaldy. Búgin osy shákirtaqyny alǵashqy ıelerine tabystadyq, - deıdi kolledj dırektory Svetlana Baqysheva.
Qazbek QUTTYMURATULY,
«Egemen Qazaqstan»
