Bul jolǵy saıysqa Reseı, Vengrııa, Ispanııa, Mońǵolııa, Qyrǵyzstan, Birikken Arab Ámirligi, Qytaı, Túrkimenstan tárizdi jeti memlekettiń qus tilin biletin, aqsúıek ónerdi janyna serik etken saıatshylary qatysyp otyr. Qazaqstannyń ár aımaǵynan da qyranynyń qaıratynan úmit etken elýge jýyq qusbegiler jınalǵan. Keıbireýi qoldaryna qos-qostan qyran qondyrǵan.
Halyqaralyq týrnırdiń ashylý saltanatynda sóz sóılegen oblys ákimi Málik Myrzalın óńirde ulttyq sporttyń óńi jaqsaryp, Elbasy Nursultan Nazarbaevtyń «Bolashaqqa baǵdar: rýhanı jańǵyrý», «Uly dalanyń jeti qyry» maqalalarynan keıin sony serpin alǵandyǵyn erekshe ekpin túsirip aıtyp ótti. Býrabaı aspanyn qyran qustyń kerege qanattarymen kómkerip, rýhtandyrǵan jarysqa alystan at aryltyp jetken sheteldik qonaqtar da osy bir ózgeshe saltanatty, aıryqsha qyzǵylyqty týrnırdi uıymdastyrýshylarǵa aq alǵystaryn aıta kelip, óz tańdanystaryn da bildirdi.
–Baıanaýyldan keldik,–deıdi qusbegi Tasybaı Imanzaıyp,–eki búrkit ákeldim. Ekeýi de qolbala qustar. Árıne, túz qusynyń ójettigi, alymdylyǵy kúshti ǵoı.
Halyqaralyq týrnırdiń kórermenderi neken-saıaq. Negizinde qusbegilerdiń ózderi men atqosshylary. Qalam ustaǵan jazarman qaýym, tóreshiler men uıymdastyrýshylar. Tý sonaý taý basynan quldılap, jaqtan sýyrylǵan jalǵyz jebedeı ysqyra uıytqyp kelip, taý etegindegi ańǵarǵa zymyraı júıtkip bara jatqan ań ataýlyǵa on naızasyn oqtalǵan, naızaǵaıdaı atylǵan surapyl ónerdiń saltanatyn bylaıǵy jurt nege kórmeske?! Tipti, osy bir kórinistiń ózi alpys eki tamyryńda qalǵyp ketken baǵzy bir sezimderdi dúr etkizip oıatyp, keýdeńdi alapat shattyq bıleıdi eken. Kók aspannyń kórki bolǵan, aqsha bultpen astasqan sonaý bıiktegi qyrandy aıtqanyna kóndirip, degenine júrgizip, kózdegenine ushyryp otyrǵan qusbegilik óner qandaı keremet, shirkin! О́zekti órter ókinishi de sol, qansonardyń qyzyǵyn qansha qaýym kóre almady. Álde jarnamasy kem, qulaqtandyrylýy az. Áıtpese, nege kórmesin?!
Aldymen irikteý saıysy ótkizilgen. Aınymaı túsken qyrandar aqtyq synǵa joldama aldy. Jarys barysynda qyran kelbeti de, túr-túsi de, beıne-bitimi de eskerildi. Eń bastysy, alǵyrlyǵy. Qoıanǵa qyr asyrmaǵan qyrandar alpys eki aılaly túlkige kelgende ábjildigi alqynǵandaı. Qazylar alqasynyń sheshimimen jerlesimiz, Krasnyı ıar aýylynyń turǵyny, qusbegi Rýslan Týmýrzın bas júlde – «Nıva» avtokóligine ıe boldy. Barlyq jeńimpaz qusbegilerge kádeli syılyqtar tartý etildi. Eki kún boıy Býrabaı baýraıyn bóktirgen qusbegiler saıysy elimizde tól ónerimizdiń týyn tiktep kele jatqandyǵyn jeti memleketten jınalǵan támam elge tanytty.
Baıqal BAIÁDIL,
«Egemen Qazaqstan»
Aqmola oblysy,Býrabaı aýdany
