– Biz álemniń ozyq damyǵan 30 eliniń qataryna qosylýdy maqsat tutqan berik ári ornyqty memleket qurdyq. Damý jolyn ustana otyryp, biz túrli salalar men baǵyttarda zor tabysqa jettik. Bul jetistikterge barsha qazaqstandyqtardyń kúsh-jigeri men jasampaz qýatynyń arqasynda qol jetkizdik, – dedi Elbasy.
Qazaqstan Prezıdenti memleketimiz jyl saıyn Otanymyzdyń gúldenýine zor úles qosqan azamattaryn nagradalarmen marapattap, syılyqtar tapsyratynyn aıtyp, mundaı marapatqa eń úzdikter, kásibı turǵydan bıikti baǵyndyrǵan jáne qoǵam tarapynan moıyndalǵan adamdar ǵana ıe bolatynyna toqtaldy.
– Sizder óskeleń urpaq pen elimizdiń barsha azamattary úshin aıanbaı qyzmet etýdiń, eńbekti aıryqsha qurmetteýdiń jáne naǵyz patrıotızmniń jarqyn úlgisi bolyp sanalasyzdar. Sizderdiń jetistikterińiz memlekettiń eń joǵary baǵasyna jáne halyqtyń qurmetine ıe bolýǵa tıis, – dedi Nursultan Nazarbaev.
Memleket basshysy «Qazaqstannyń Eńbek Eri» ataǵyn «Aqtóbe qalasy sal aýrýyna shaldyqqan azamattardy qoldaý ortalyǵy» qoǵamdyq birlestiginiń tóraıymy Quralaı Bazarbaıqyzy Báımenovaǵa berip, onyń ómir qıynshylyqtaryna moıymaı, kerisinshe, taǵdyr taýqymetin tartqan adamdarǵa kómek kórsetip júrgenin atap ótti. Qazirgi kezde Q.Báımenova múmkindigi shekteýli jandarǵa qoldaý kórsetý jónindegi jobalardy iske asyrýda.
– «Qazaqstannyń Eńbek Eri» mártebeli ataǵyn Alına Robertovna Soloveva ıelenedi. Ol – ulaǵatty ustaz, óz óńirindegi bilim berý júıesin damytýǵa mol úles qosty. A.Soloveva jańashyl ári shyǵarmashyl pedagog retinde álemniń úzdik tájirıbeleri men zamanaýı tehnologııalaryn oqý-tárbıe úderisine belsendi túrde engizip keledi, – dedi Qazaqstan Prezıdenti.
Elbasy «Qazaqstannyń Eńbek Eri» ataǵymen Saırambaı Áliqululy Dónenbaevty marapattaı otyryp, iri sharýa qojalyǵynyń basshyly bola tura, ol adal eńbegi arqyly týǵan jeriniń damýyna jáne órkendeýine aıtarlyqtaı úles qosyp kele jatqanyn aıtty.
– II dárejeli «Barys» ordenimen Abaı Qabataıuly Baıgenjın marapattalady. Onyń búkil kásibı qyzmeti medısına salasymen tikeleı baılanysty. Ol elimizdiń densaýlyq saqtaý salasynyń jetekshi mekemelerin qurý jáne damytý isine zor úles qosty, – dedi Nursultan Nazarbaev.
Elbasy Qazaqstannyń halyq jazýshysy Qabdesh Jumadildi II dárejeli «Barys» ordenimen marapattap, onyń tarıhı romandary men shyǵarmalary álemniń kóptegen tiline aýdarylǵanyn jáne qazaq ádebıetiniń altyn qoryna engenin atap ótti.
– III dárejeli «Barys» ordeni Oleg Vladımırovıch Danılenkoǵa tabys etiledi. Ol shırek ǵasyrdan astam ýaqyt boıy elimizdiń aýyl sharýashylyǵynda jemisti eńbek etti. O.Danılenko basqaratyn argofırma asyl tuqymdy mal sharýashylyǵynda joǵary nátıjelerge qol jetkizip, aýyldyń áleýmettik salasyna laıyqty qoldaý kórsetip keledi, – dedi Memleket basshysy.
Qazaqstan Prezıdenti III dárejeli «Eńbek Dańqy» ordenin «Kazakhmys Smelting» jaýapkershiligi shekteýli seriktestigi mys qorytý zaýytynyń balqytýshysy Temirjan Sabyrjanuly Bekjanovqa tabys etti.
Nursultan Nazarbaev Astana qalalyq Ishki ister departamenti Jol-patrýldik polısııasynyń ınspektory Azamat Qanatuly Baltabaevty II dárejeli «Aıbyn» ordenimen marapattaı otyryp, qaharman kásibiniń ıeleri azamattarymyzdyń qaýipsizdigi men tynyshtyǵyn qamtamasyz etý jolynda árdaıym erlik kórsetýge ázir ekenin aıtty.
– Qıyn jaǵdaıda, ózine qaýip tónip tursa da, Azamat tórt adamnyń, sonyń ishinde bir balanyń ómirin qutqaryp qaldy, – dedi Elbasy.
Memleket basshysy adam ómirin qutqarýda erlik pen batyldyq tanytqany úshin III dárejeli «Aıbyn» ordenimen Ishki ister mınıstrliginiń Qyzylorda oblystyq Tótenshe jaǵdaılar departamentiniń №2 órtke qarsy mamandandyrylǵan bólimshesiniń komandıri Ermekbek Pazlıevti marapattady.
Sonymen qatar, Qazaqstan Prezıdenti marapattalýshylar qatarynda ǵylym, mádenıet jáne óner qaıratkerleri, bilim berý jáne densaýlyq saqtaý salasynyń qyzmetkerleri, kásipkerler men óndirisshiler, áskerıler men quqyq qorǵaý organdarynyń qyzmetkerleri, eńbek ardagerleri, sportshylar men memlekettik qyzmetshiler bar ekenin atap ótti.
– Búgin biz eń úzdikterdi, sonyń ishinde eliniń gúldenýi men halqynyń ál-aýqatynyń artýy úshin bar bilimin, qýaty men kúshin jumsaýǵa ázir óz Otanynyń naǵyz patrıottaryn marapattap otyrmyz. Sizder óz isterińizge adal bolǵandyqtan, eńbekti súıgendikterińizden, erlik jasaǵandyqtan áriptesterińizdiń arasynda bedelge ıe bolyp, qoǵamymyzdyń qurmetine bólendińizder, – dedi Nursultan Nazarbaev.
Elbasy ádebıet pen óner salasyndaǵy joǵary marapatty Tynyshtyqbek Ábdikákimovke, Aqushtap Baqtygereevaǵa jáne О́tegen Oralbaevqa tabys etip, azamattarymyzdyń rýhanı turǵydan jańǵyrýy men shyǵarmashylyq áleýetiniń damýy elimizdiń mańyzdy basymdyǵy bolyp sanalatynyn aıtty.
– Memlekettik syılyqtar «Abaı» operasyn qoıǵan jáne «Anaǵa aparar jol» fılmin túsirgen shyǵarmashylyq ujymdarǵa beriledi. Bul joǵary kórkemdik deńgeıde oryndalǵan týyndylar Qazaqstan mádenıeti men ónerin álemde ilgerileýge septigin tıgizedi, – dedi Memleket basshysy.
Budan bólek, rásim barysynda I, II, III dárejeli «Barys» ordenderi eńbek ardageri J.S.Káribjanovke, «Qazaqstan temir joly» UK» AQ basqarma tóraǵasy S.M.Myńbaevqa, «Qazaq ulttyq óner ýnıversıteti» RMM professory S.Sh.Orazalyǵa, Ortalyq saılaý komıssııasynyń tóraǵasy B.M.Imashevke tabys etildi.
«Parasat» ordenimen Soltústik Qazaqstan oblysynyń ákimi Q.I.Aqsaqalov, Qorǵanys jáne aeroǵarysh ónerkásibi mınıstri B.B.Atamqulov, Memlekettik qyzmet isteri jáne sybaılas jemqorlyqqa qarsy is-qımyl agenttigi apparatynyń jetekshisi S.Q.Ahmetjanov, «Abaı atyndaǵy Qazaq ulttyq pedagogıkalyq ýnıversıteti» RMK rektory T.O.Balyqbaev, «Qazaqstan Respýblıkasy Prezıdentiniń Teleradıokesheni» KEAQ bas dırektory E.Q.Bekhojın, Premer-Mınıstrdiń orynbasary E.A.Dosaev, Jambyl oblysynyń ákimi A.I.Myrzahmetov, «Uniserv» JShS baqylaýshy keńesiniń tóraǵasy N.Sátbaev, Mańǵystaý oblysynyń ákimi E.L.Toǵjanov marapattaldy.
«Qurmet» ordenimen marapattalǵandar qatarynda Densaýlyq saqtaý mınıstri E.A.Birtanov, «Qazaq ulttyq horeografııa akademııasy» KEAQ oqytýshysy L.V.Makarseva, Ulttyq ekonomıka mınıstri T.M.Súleımenov, N.Tilendıev atyndaǵy akademııalyq folklorly-etnografııalyq orkestriniń bas dırıjeri D.N.Tilendıeva bar.
«Qazaqstannyń eńbek sińirgen qaıratkeri» ataǵy kıno ártisi S.I.Eslıamovaǵa jáne «Qurmanǵazy atyndaǵy Qazaq ulttyq konservatorııasy» RMM aǵa oqytýshysy Iа.S.Rýdkovskııge berildi.
Áskerı jáne qyzmettik boryshyn úlgili atqarǵany, zańdylyq pen quqyqtyq tártipti qamtamasyz etý, eldiń ulttyq qaýipsizdigi men qorǵanys qabiletin nyǵaıtý kezinde kórsetken erligi men qajyrlylyǵy úshin II dárejeli «Dańq» ordenimen jáne «Jaýyngerlik erligi úshin» medalimen áskerı qyzmetshiler men quqyq qorǵaý organdary ókilderiniń bir toby, atap aıtqanda Ulttyq qaýipsizdik komıteti Soltústik Qazaqstan oblysy boıynsha departamentiniń bastyǵy A.A.Aqshaev, Qorǵanys mınıstriniń orynbasary M.M.Altynbaev, Almaty qalasynyń prokýrory B.Q.Júıriktaev, Qazaqstan Respýblıkasy Qarýly Kúshteri Áýe qorǵanysy kúshteri Áskerı-áýe kúshteriniń qolbasshysy D.J.Qosanov, Memlekettik kúzet qyzmeti Obektilerdi qorǵaý qyzmeti «Aıbyn» Prezıdenttik polki» rásimdik batalony qurmet qaraýyl rotasynyń bólimshe komandıri Á.A.Tórebekov marapattaldy.
Sonymen qatar, rásim barysynda Qazaqstan Respýblıkasynyń ádebıet pen óner salasyndaǵy 2018 jylǵy memlekettik syılyq «Abaı» operasy úshin T.N.Álpıev, S.Á.Baıǵojın, Ǵ.A.Ahmadııarovtan quralǵan avtorlar ujymyna jáne «Anaǵa aparar jol» tolyqmetrli kórkem fılmi úshin A.Q.Sataev, Á.N.Nazarbaeva, A.B.Nógerbek, Á.E.Ahmetovtan quralǵan avtorlar ujymyna tabys etildi.
Sońynda Qazaqstan Prezıdenti memlekettik nagradalar men syılyqtar elimizdiń basty merekesi – Táýelsizdik kúni qarsańynda tabys etilýiniń sımvoldyq mánine toqtaldy.
– Sizder memlekettiń osy joǵary baǵasyna laıyqty bolyp, Qazaqstan halqynyń ıgiligi jolynda qyzmet ete beretinderińizge senimdimin. Jastarymyz sizder salǵan jolmen júrip, jańa belester men isterdi baǵyndyratyn bolady. Otanymyzdyń qaýipsizdigi men baqýattylyǵy sizderdiń qoldaryńyzda! Osy joǵary ári mártebeli mıssııaǵa árqashan laıyq bolyńyzdar! – dedi Nursultan Nazarbaev.
