Elimizdiń ulyq merekeleriniń biri – Táýelsizdik kúnine arnalǵan saltanatty shara memlekettik Týdy saltanatpen ákelýden jáne Ánuranmen bastaldy.
–Táýelsizdik alǵan shırek ǵasyrdan astam ýaqyt ishinde Qazaqstan keleshegi kemel, bolashaǵy bekem, qýatty memleket qurdy,–dedi oblys ákimi.
Munan soń Memleket basshysy N.Nazarbaevtyń «Uly dalanyń jeti qyry» maqalasynda aıtylǵanyndaı ótken tarıhty bilmeı, bolashaqqa baǵdar ustanýdyń qıyndyǵyn aıtyp, maqtanysh eter tarıhı jetistikterimizdi nasıhattaýdyń jóni bólek ekendigin tilge tıek etti.
Táýelsiz memleketimizde alǵashqy Qorǵanys Mınıstri bolyp bizdiń jerlesimiz, armııa generaly Saǵadat Nurmaǵambetovtyń qyzmet atqarýy aqmolalyqtar úshin zor maqtanysh. Aqmola oblysynyń táýelsiz eldiń damýyna qosyp otyrǵan úlesi de aıta qalarlyqtaı. Bıylǵy jyldyń ózinde toǵyz myńǵa jýyq jańa jumys oryndary ashyldy, kóptegen iri ınvestısııalyq jobalar iske qosylýda. Elimizdiń iri, irgeli óndiris orny sanatyndaǵy – «Kókshetaý-Altyntaý», «Stepnogorsk podshıpnık zaýyty», «Kókshetaý mıneraldy sýlary» tárizdi kásiporyndar óndiris kólemin arttyryp, salany damytýǵa aıryqsha úles qosýda.
–Bıyl aqmolalyq dıqandar 5,6 mıllıon tonna astyqty qambaǵa quıyp, gektar berekesin 13 sentnerge jetkizdi,–dedi oblys basshysy,–jyl sońyna deıin oblysta bes myń páterge paıdalanýǵa beriletin bolady. Oblys ortalyǵynda 900 oryndyq IT mektep-lıseıi ashyldy. Aldaǵy jyldary úsh myń oryndyq jataqhana salynbaqshy. Osynyń barlyǵy el táýelsizdiginiń arqasynda.
Munan soń oblys ákimi eńbekte erekshe kózge túsken bir top aqmolalyqtarǵa memlekettik nagradalar tapsyrdy. Saltanatty sharanyń sońy merekelik konsertke ulasty. Táýelsizdikke arnalǵan saltanatty jıyndar oblystyń barlyq qalalary men aýdan ortalyqtarynda bolyp ótti.
Baıqal BAIÁDIL,
«Egemen Qazaqstan»
Aqmola oblysy
