Tyńnyń epısenti bolyp, qazaqy bolmys qaǵajý qalǵan óńirde Alashtyń asyp týǵan perzenti – Abylaı hannyń eskertkishi el eńsesin kóterýge septigin tıgizbek. Bul da eldiń rýhanı jańǵyrýynyń, ótkeniniń ónegeli joldaryn izdep, tylsym tarıhtyń tuńǵıyǵyndaǵy tarıhı tulǵalardyń qaıta túlegen sonydan jańǵyrǵan soqpaǵy deýge ábden bolady.
Uly hannyń eskertkishiniń ashylýyna aýdan turǵyndary kóptep jınaldy. Shashý shashylyp, aq tilekter aıtyldy. Alty Alashtyń balasynyń bolashaǵy úshin at jalynda ǵumyr keshken Abylaı hannyń aıbarly keskini qylaýlap jaýǵan aq qardyń astynda ózgeshe reńmen tartymdy bolyp kórinedi eken. Qııaǵa kóz tikken kemeńger han táýelsiz eliniń bolashaǵyn baǵyp turǵandaı. О́zi murat etken kemel keleshektiń kesimdi sheshimin aıtatyndaı.
Bul bir aq túıeniń qarny jarylǵan kún boldy. Negizinen, jergilikti ult azdaý qonystanǵan aýdan jańa jańalyqpen qanattanyp, respýblıka jurtshylyǵy úshin eń qasıetti merekeniń barysynda kenen jaqsylyqpen jarylqanyp, bir jasap qaldy.
Baıqal BAIÁDIL,
«Egemen Qazaqstan»
Shortandy aýdany
