Bıiktigi 16 metr bolatyn «Máńgilik el» monýmenti ornatylǵan saıabaq jasyl jelekpen kómkerilgen. Demalys ornynyń qurylysyna 79 mln teńge qarjy jumsalypty. Qala ortalyǵynda taza aýamen tynystap, alańsyz serýendeýge bolatyn saıabaqtyń jol jıegine jaıly oryndyqtar men ásem shamdar ornatylǵan. «Qurmetti azamattar» alleıasy da qala turǵyndarynyń kóz qýanyshyna aınaldy. Aýdannyń damýyna ólsheýsiz úles qosqan Arys qalasynyń qurmetti azamattarynyń esimderi tasqa qashap jazylǵan alleıa qurylysyna 47 mln teńge jumsalǵan.
Jalpy 16 jeltoqsanda Arys qalasynda 16 nysan el ıgiligine paıdalanýǵa berildi. Elbasynyń «Jaılylyq degenimiz-eń aldymen turǵyn úıdiń qoljetimdiligi, aýlanyń ádemiligi men qaýipsizdigi, tirshilikke jáne jumys isteýge qolaıly eldi mekenniń jáne sapaly ınfraqurylymnyń bolýy», - degen sózin basshylyqqa alǵan Arys qalasynyń ákimdigi turǵyndar úshin barlyq jaǵdaı jasalǵan úılerdi el ıgiligine berdi. «Nurly jer» baǵdarlamasy aıasynda qaladaǵy «Kóktem» shaǵynaýdanynan boı kótergen 3 turǵyn úıdiń, ıaǵnı 36 páterdiń kilti baspanaǵa muqtaj, úı kezeginde turǵan otbasylarǵa tabys etildi. Sondaı-aq mereke kúni balalardyń bos ýaqyttaryn tıimdi paıdalanyp, sportpen shuǵyldanýyna barlyq jaǵdaı jasalǵan sport alańshalary ashyldy.
Ǵalymjan ELShIBAI,
«Egemen Qazaqstan»
Túrkistan oblysy
