Qazaqstannyń batys óńirine jáne shekaralas Reseı aımaǵyna belgili zııarat orny – el-jurt Dádem ata dep qasterleıtin áýlıe Jumaǵazy qaziret kesenesinde osyndaı shara bıyl besinshi márte ótkizilip otyr.
- Biz dástúrli túrde ár jyl saıyn 4 márte arnaıy qurban shalyp, kópshilikke arnalǵan as beremiz. Onyń biri 14 naýryz – Qazaqstannyń batys óńirine taralǵan Kórisý kúni merekesi. Odan keıin 31 mamyr – saıası qýǵyn-súrgin jáne asharshylyq qurbandaryna arnap mal soıyp, Quran baǵyshtaımyz. Tamyzdyń ekinshi jeksenbisinde – Jumaǵazy qazirettiń ózine arnalǵan as beriledi. Al jyl sońyna qaraı, Qazaqstannyń Táýelsizdik kúni - 16 jeltoqsanda – qazaq halqynyń táýelsizdigi jolynda kúresken handarymyz ben bılerimizdiń, batyrlarymyz ben barsha bozdaqtardyń rýhyna baǵyshtap shara ótkizemiz, - deıdi «Dádem ata» qoǵamdyq qorynyń tóraǵasy Ǵarıfolla Jambozov.
Aýa raıynyń qolaısyzdyǵyna qaramastan Oral qalasynan 80 shaqyrymdaı qashyq jatqan zııarat keshenge halyq kóp jınaldy. Aıta keteıik, «Tolaǵaı» qoǵamdyq birlestiginiń jetekshisi, bloger Nurlan Sádirdiń uıymdastyrýymen dinı-ǵıbadat oryndaǵy sharanyń qoǵamdyq sıpaty basym boldy. Máselen, Batys Qazaqstan ınnovasııalyq-tehnologııalyq ýnıversıtetiniń oqytýshysy, ólketanýshy Saılaý Súleımenov Qazaqstan táýelsizdiginiń 27-jylynda atalyp ótiletin tarıhı oqıǵalarǵa, mereıli datalarǵa sholý jasasa, Qazaqstannyń eńbek sińirgen qaıratkeri, Hadısha Bókeeva atyndaǵy Batys Qazaqstan oblystyq qazaq drama teatrynyń ardager artısi Gúljııan Shyntemir bıyl 25 jyldyǵyn atap ótkeli otyrǵan Táýelsizdik týdyrǵan teatrdyń qalyptasý tarıhynan estelik aıtty.
Batys Qazaqstan oblystyq tarıh jáne arheologııa ortalyǵynyń dırektory Jantas Safýllın belgili aǵartýshy, aqyn Ǵumar Qarashtyń úshtomdyq jınaǵyn tanystyrsa, aqyn, bilim salasynyń ardageri Darıǵa Mushtanova óziniń «Abysyndar» jınaǵyn «Dádem ata» qorynyń kitaphanasyna syıǵa tartty. Atyraý qalasynan arnaıy kelgen kásipker Maral Qabyl tabıǵaty qolaısyz óńirde baý-baqsha egý tájirıbesin ortaǵa salyp, Jumaǵazy qaziret zııaraty keshenin abattandyrý týraly usynys jasady. Asan meshitiniń ımamy Muratbek qajy Jahatov Quran aıatyn oqyp, saýabyn táýelsizdik qurbandaryna baǵyshtaǵan soń HIH ǵayrdaǵy qazaq dalasynda, sonyń ishinde Bókeılikte bolǵan dinı-aǵartý jumysy, meshit-medreselerdiń qyzmeti týraly Reseı Federasııasynyń Ýfa arhıvinde saqtalǵan tarıhı qujattar týraly aıtyp berdi. Zııarat keshen ornalasqan Syrym aýdany Sholaqańqaty aýyldyq okrýginiń ákimi Tımýr Aıtqalıev óz sózinde «Rýhanı jańǵyrý» baǵdarlamasy aıasynda Qazaqstannyń jalpyulttyq qasıetti nysandary tizimine engizilgeli Jumaǵazy qaziret keshenine elimizdiń túkpir-túkpirinen kelýshiler kóbeıgenin atap ótti.
Aıta keteıik, jergilikti atqarý organdary zııarat keshenniń jan-jaqty damýyna qoldaý kórsetýde. О́tken kúzde osy jerge arnaıy kelgen óńir basshysy Altaı Kólginov 2019 jyly keshenge aparar úsh shaqyrymdyq joldyń jóndeletinin málimdegen bolatyn.
- Kez kelgen kópshilik merekeniń basty maqsaty – kúndelikti ómirde qyzmet salasy, kózqarasy ártúrli adamdardyń basyn qosý, biriktirý ǵoı. Sonyń ishinde tómennen, halyqtyń óz ishinen shyqqan bastamanyń orny bólek. Elimizde Táýelsizdik merekesin atap ótýdiń jalpyhalyqtyq formasy áli qalyptaspaǵan kezeńde osyndaı dástúrli shara, qazaqy uǵymǵa jaqyn jıyndar óte kerek. Búgingi basqosýdyń mańyzdylyǵy da osynda. - deıdi saıasattanýshy, «Aspandaý» ǵylymı bilim berý qory Batys fılıalynyń atqarýshy dırektory Erkin Erǵalıev.
As kezinde Qazaqstan Jazýshylar odaǵynyń múshesi, aqyn Munaıdar Balmolda Táýelsizdik kúnine arnaǵan «Azamattyń armany» atty óleńin oqyp berdi. Oral qalasynda belgili «Aqberen» jas aqyndar mektebiniń bir top shákirti de el men jerge arnalǵan patrıottyq jyr shýmaqtaryn ortaǵa saldy. Belgili jyrshy, halyqaralyq baıqaýlardyń júldegeri Farhat Orazov dástúrli ánderdi shyrqasha, jas dombyrashylar kúı kúmbirin áýeletti. Jınalǵandar Qazaqstannyń Táýelsizdigi máńgi bolýyna duǵa qylǵan aqsaqaldardyń batasyn alyp, tarqasty.
Qazbek QUTTYMURATULY,
«Egemen Qazaqstan»
Batys Qazaqstan
