Balalarǵa arnalǵan ǵajaıyp kesh barysynda qala ákimi Baýyrjan Baıbek Táýelsizdik kúnine arnaıy quttyqtaýyn joldaı otyryp, qaıyrymdylyq sharanyń qatysýshylaryna «Sıqyrly áýender» balalar arasynda klassıkalyq týyndylardy Dısneı fılmderinen tanys keıipkerler arqyly dáripteı otyryp, erekshe qýanysh syılatyndyǵyn atap ótti. Qala basshysynyń aıtýynsha, bılet satylymdarynan jınalǵan qarajat «Bolashaq» korporatıvtik qorymen «Árbir bala mektepke laıyq» jáne «Sapar granttary» jobalaryn qoldaýǵa baǵyttalatyn bolady.
Búginde DDU derekteri boıynsha Qazaqstanda aýtızm anyqtalǵan 35 myńǵa jýyq bala bar. «Bolashaq» korporatıvtik qorynyń qaıyrymdylyq qoldaýymen Qazaqstannyń 9 qalasynda 20 ınklıýzııalyq qoldaý bólimshesi ashylyp, 800-den astam densaýlyq saqtaý jáne bilim berý mamandary oqytylǵan. Jyl basynan bergi aralyqta qor tarapynan ınklıýzıvti 4 kórsetilim ótkizilgen.
Reseı men TMD elderindegi Dısneı kompanııasynyń bas atqarýshy dırektory Marına Jıgalova-Ozkan aýtızm spektriniń buzylýy anyqtalǵan balalarǵa arnalǵan kınokonsert ótkizý úlken qaıyrymdy isterge arqaý bolatyndyǵyn jetkizse, «Bolashaq» korporatıvtik qorynyń dırektory Dınara Chaıjýnýsova bul keshte balalar sıqyrly áýenderdi tyńdap qana qoımaı, talantty balalardyń ártúrli baıqaýlarǵa qatysýyna, birlese maqsattarǵa jetýine múmkindik beredi dep atap ótti.
«Sıqyrly áýender» keshinde «Sýyq júrek», «Arystan patsha», «Sý perisi», «Arý men qubyjyq», «Mýlan», «Aladdın» jáne «Pokahontas» anımasııalyq fılmderinen oryndalǵan kompozısııalar tyńdaýshylarǵa rasynda da sıqyrly bir álemniń ǵajaıyptaryna jetelep ketkendeı áser qaldyrdy. Anımasııalyq fılmderdiń áýenderin Aleksandr Belıakovtyń basshylyǵyndaǵy Almaty ákimdiginiń estradalyq-sımfonııalyq orkestri oryndady.
Dısneı kompanııasy London, Tokıo, Parıj, Máskeý jáne taǵy da basqa qalalarda osy mazmundaǵy konsertter ótkizýde. Kınokonsertte oryndalǵan saýndtrekter esimderi álemge belgili Hans Sımmer, Alan Menken ı Djerı Goldsmıt sııaqty kompozıtorlardyń shyǵarmalarynan alynǵan. Almatydaǵy kınokonsertte eki myńnan asa kórermen jınaldy. Bes júzden astam bıletter erekshe muqtajdyqqa zárý balalarǵa bólindi.
Elvıra Serikqyzy,
«Egemen Qazaqstan»
ALMATY
