– Biz álemniń ozyq damyǵan 30 eliniń qataryna qosylýdy maqsat etken qýatty ári ornyqty memleket qurdyq. Biz damý jolyn ustana otyryp, túrli salalar men baǵyttar boıynsha zor tabysqa jettik. Bul jetistikterge barsha qazaqstandyqtardyń kúsh-jigeri men jasampaz qýatynyń arqasynda qol jetkizdik, – dedi Elbasy.
Qazaqstan Prezıdenti memleketimizde jyl saıyn elimizdiń gúldenýine zor úles qosqan azamattar nagradalarmen marapattalyp, mundaı marapattar eń úzdikterge, kásibı turǵydan bıik belesti baǵyndyrǵan jáne qoǵam tarapynan moıyndalǵan tulǵalarǵa tapsyrylatynyn atap ótti.
– Sizder óskeleń urpaq pen elimizdiń barsha azamattaryna aıanbaı qyzmet etýdiń, aıryqsha eńbeksúıgishtiktiń jáne naǵyz patrıotızmniń jarqyn úlgisin kórsetip kelesizder. Sizderdiń jetistikterińiz memlekettiń eń joǵary baǵasyna jáne halyqtyń qurmetine laıyq, – dedi Nursultan Nazarbaev.
Memleket basshysy «Qazaqstannyń Eńbek Eri» ataǵyn «Aqtóbe qalasy sal aýrýyna shaldyqqan azamattardy qoldaý ortalyǵy» qoǵamdyq birlestiginiń tóraıymy Quralaı Bazarbaıqyzy Báımenovaǵa berip, onyń ómir qıynshylyqtaryna moıymaı, taǵdyr taýqymetin tartqan adamdarǵa kómek kórsetip júrgenin atap ótti. Qazirgi kezde Q.Báımenova múmkindigi shekteýli jandarǵa qoldaý kórsetý jónindegi jobalardy iske asyrýda. Jıynda sóz alǵan marapat ıesi barsha qaýymdy Táýelsizdik kúnimen quttyqtap, qoǵamǵa qosqan úlesiniń baǵalanǵanyna, eńbeginiń elengenine alǵysyn bildirdi.
– Árbir qazaqstandyq sekildi men de halyqaralyq ahýaldy qadaǵalap júremin. Osyǵan baılanysty beıbitshilik, turaqtylyq úshin, balalardy tárbıeleı alatynymyz úshin jáne erteńge senimmen qaraı alatynymyz úshin Nursultan Ábishuly Sizge úlken analyq alǵysymdy aıtqym keledi, − dedi Quralaı Báımenova.
«Qazaqstannyń Eńbek Eri» mártebeli ataǵyn ulaǵatty ustaz, óz óńirindegi bilim berý júıesin damytýǵa mol úles qosqan Alına Robertovna Soloveva ıelendi. Sonymen qatar Elbasy «Qazaqstannyń Eńbek Eri» ataǵymen Saırambaı Áliqululy Dónenbaevty marapattaı otyryp, onyń iri sharýa qojalyǵynyń basshysy retinde adal eńbek etip, týǵan jeriniń damýyna jáne órkendeýine aıtarlyqtaı úles qosyp kele jatqanyn aıtty.
– II dárejeli «Barys» ordenimen Abaı Qabataıuly Baıgenjın marapattalady. Onyń búkil kásibı qyzmeti medısına salasymen baılanysty. Ol elimizdiń densaýlyq saqtaý salasynyń jetekshi mekemelerin qurý jáne damytý isine zor úles qosty, – dedi Nursultan Nazarbaev.
Elbasy Qazaqstannyń Halyq jazýshysy Qabdesh Jumadildi II dárejeli «Barys» ordenimen marapattap, onyń tarıhı romandary men shyǵarmalary álemniń kóptegen tiline aýdarylǵanyn jáne qazaq ádebıetiniń altyn qoryna engenin atap ótti.
– III dárejeli «Barys» ordeni Oleg Vladımırovıch Danılenkoǵa tabys etiledi. Ol shırek ǵasyrdan astam ýaqyt boıy elimizdiń aýyl sharýashylyǵynda jemisti eńbek etýde. Oleg Danılenko basqaratyn argofırma asyltuqymdy mal sharýashylyǵynda joǵary nátıjelerge qol jetkizip, aýyldyń áleýmettik salasyna laıyqty qoldaý kórsetip keledi, – dedi Memleket basshysy.
Qazaqstan Prezıdenti III dárejeli «Eńbek Dańqy» ordenin «Kazakhmys Smelting» jaýapkershiligi shekteýli seriktestigi mys qorytý zaýytynyń balqytýshysy Temirjan Sabyrjanuly Bekjanovqa tabys etti.
Kelesi kezekte Elbasy Astana qalalyq Ishki ister departamenti Jol-patrýldik polısııasynyń ınspektory Azamat Qanatuly Baltabaevty II dárejeli «Aıbyn» ordenimen marapattaı otyryp, qaharmandyqqa baýlıtyn mamandyq ıeleri azamattarymyzdyń qaýipsizdigi men tynyshtyǵyn qamtamasyz etý jolynda árdaıym erlik kórsetýge ázir ekenin aıtty.
– Qıyn jaǵdaıda, ózine qaýip tónip tursa da, Azamat tórt adamnyń, sonyń ishinde bir balanyń ómirin qutqaryp qaldy, – dedi Elbasy.
Memleket basshysy adam ómirin qutqaryp, erlik pen batyldyq tanytqany úshin III dárejeli «Aıbyn» ordenimen Ishki ister mınıstrliginiń Qyzylorda oblystyq Tótenshe jaǵdaılar departamentiniń №2 órtke qarsy mamandandyrylǵan bólimshesiniń komandıri Ermekbek Pazlıevti marapattady.
Sonymen qatar Qazaqstan Prezıdenti marapattalýshylar qatarynda ǵylym, mádenıet jáne óner qaıratkerleri, bilim berý jáne densaýlyq saqtaý salasynyń qyzmetkerleri, kásipkerler men óndirisshiler, áskerıler men quqyq qorǵaý organdarynyń qyzmetkerleri, eńbek ardagerleri, sportshylar men memlekettik qyzmetshiler bar ekenin atap ótti.
– Búgin biz eń úzdikterdi, sonyń ishinde eliniń gúldenýi men halqynyń ál-aýqatynyń artýy úshin bar bilimin, qýaty men kúshin jumsaýǵa ázir óz Otanynyń naǵyz patrıottaryn marapattap otyrmyz. Sizder óz isterińizge adaldyq tanytyp, eńbekti qadirlep, erlik kórsetý arqyly áriptesterińizdiń arasynda bedelge ıe bolyp, qoǵamymyzdyń qurmetine bólendińizder, – dedi Nursultan Nazarbaev.
Elbasy ádebıet pen óner salasyndaǵy memlekettik syılyqty Tynyshtyqbek Ábdikákimovke, Aqushtap Baqtygereevaǵa jáne О́tegen Oralbaevqa tabys etip, azamattarymyzdyń rýhanı turǵydan jańǵyrýy men shyǵarmashylyq áleýetiniń damýy elimizdiń mańyzdy basymdyǵy bolyp sanalatynyn aıtty.
Budan bólek rásim barysynda I, II, III dárejeli «Barys» ordenderi eńbek ardageri J.S.Káribjanovqa, «Qazaqstan temir joly» UK» AQ basqarma tóraǵasy S.M.Myńbaevqa, «Qazaq ulttyq óner ýnıversıteti» RMM professory S.Sh.Orazalyǵa, Ortalyq saılaý komıssııasynyń tóraǵasy B.M.Imashevqa tabys etildi.
«Parasat» ordenimen Soltústik Qazaqstan oblysynyń ákimi Q.I.Aqsaqalov, Qorǵanys jáne aeroǵarysh ónerkásibi mınıstri B.B.Atamqulov, Memlekettik qyzmet isteri jáne sybaılas jemqorlyqqa qarsy is-qımyl agenttigi apparatynyń jetekshisi S.Q.Ahmetjanov, «Abaı atyndaǵy Qazaq ulttyq pedagogıkalyq ýnıversıteti» RMK rektory T.O.Balyqbaev, «Qazaqstan Respýblıkasy Prezıdentiniń Teleradıokesheni» KEAQ bas dırektory E.Q.Bekhojın, Premer-Mınıstrdiń orynbasary E.A.Dosaev, Jambyl oblysynyń ákimi A.I.Myrzahmetov, «Uniserv» JShS baqylaý keńesiniń tóraǵasy N.Sátbaev, Mańǵystaý oblysynyń ákimi E.L.Toǵjanov marapattaldy.
«Qurmet» ordenimen marapattalǵandar qatarynda Densaýlyq saqtaý mınıstri E.A.Birtanov, «Qazaq ulttyq horeografııa akademııasy» KEAQ oqytýshysy L.V.Makarseva, Ulttyq ekonomıka mınıstri T.M.Súleımenov, N.Tilendıev atyndaǵy akademııalyq folklorly-etnografııalyq orkestriniń bas dırıjeri D.N.Tilendıeva bar.
«Qazaqstannyń eńbek sińirgen qaıratkeri» ataǵy kıno ártisi S.I.Eslámovaǵa jáne «Qurmanǵazy atyndaǵy Qazaq ulttyq konservatorııasy» RMM aǵa oqytýshysy Iа.S.Rýdkovskııge berildi.
Áskerı jáne qyzmettik boryshyn úlgili atqarǵany, zań men quqyq tártibin qamtamasyz etý, eldiń ulttyq qaýipsizdigi men qorǵanys qabiletin nyǵaıtý kezinde kórsetken erligi men qajyrlylyǵy úshin II dárejeli «Dańq» ordenimen jáne «Jaýyngerlik erligi úshin» medalimen áskerı qyzmetshiler men quqyq qorǵaý organdary ókilderiniń bir toby, atap aıtqanda Ulttyq qaýipsizdik komıtetiniń Soltústik Qazaqstan oblysy boıynsha departamentiniń bastyǵy A.A.Aqshaev, Qorǵanys mınıstriniń orynbasary M.M.Altynbaev, Almaty qalasynyń prokýrory B.Q.Júıriktaev, Qazaqstan Respýblıkasy Qarýly Kúshteri Áýe qorǵanysy kúshteri Áskerı-áýe kúshteriniń qolbasshysy D.J.Qosanov, Memlekettik kúzet qyzmeti Nysandardy qorǵaý qyzmeti «Aıbyn» Prezıdent polki» rásimdik batalony qurmet qaraýyl rotasynyń bólimshe komandıri Á.A.Tórebekov marapattaldy.
Sonymen qatar rásim barysynda Qazaqstan Respýblıkasynyń ádebıet pen óner salasyndaǵy 2018 jylǵy memlekettik syılyq «Abaı» operasy úshin T.N.Álpıev, S.Á.Baıǵojın, Ǵ.A.Ahmadııarov engen avtorlar ujymyna jáne «Anaǵa aparar jol» tolyqmetrli kórkem fılmi úshin A.Q.Sataev, Á.N.Nazarbaeva, A.B.Nógerbek, T.Q.Jaqsylyqov, Á.E.Ahmetov engen avtorlar ujymyna tabys etildi.
Sońynda Qazaqstan Prezıdenti memlekettik nagradalar men syılyqtardyń basty merekemiz – Táýelsizdik kúni qarsańynda berilýiniń sımvoldyq mánine toqtaldy.
– Sizder memlekettiń osy joǵary baǵasyna laıyqty bolyp, Qazaqstan halqynyń ıgiligi jolynda qyzmet ete beredi dep senemin. Jastarymyz ózderińiz salǵan jolmen júrip, jańa belesterdi baǵyndyratyn bolady. Otanymyzdyń qaýipsizdigi men baqýattylyǵy sizderdiń qoldaryńyzda. Osy joǵary ári mártebeli mıssııaǵa árqashan laıyq bolyńyzdar – dedi Nursultan Nazarbaev.
Erkejan AITQAZY,
«Egemen Qazaqstan»
