Is-sharaǵa «Nur Otan» partııasy Tóraǵasynyń birinshi orynbasary Máýlen Áshimbaev, Parlament Májilisiniń depýtaty Nurtaı Sabılıanov, belgili saıasattanýshy Aıdos Sarym, «Kıeli Qazaqstan» ǵylymı-zertteý ortalyǵynyń basshysy Berik Ábdiǵalıuly jáne Garvard ýnıversıtetiniń túlegi Shyńǵys Muqan qatysty. Otyrysty ǵalym, Halyqaralyq Túrki akademııasynyń prezıdenti, «Egemen Qazaqstan» gazetiniń basshysy Darhan Qydyráli júrgizdi.
Qazirgi tańda «Nur Otan» partııasy óz qyzmetin jańǵyrtý jolynda #NurOtanTrends jáne #NurOtanTalks sııaqty tyń bastamalardy qolǵa alyp, júıeli jumys istep kele jatqany belgili. Al #NurOtanPikir jańa jobasynda halqymyzdyń rýhanı qundylyqtaryn dáripteý, tarıhı sanany jańǵyrtý, sol arqyly ulttyń sanasyn oıatý, memlekettik til men mádenıetimizdi odan ári damytý, táýelsizdigimizdi nyǵaıtý sııaqty ulttyq máseleler talqyǵa túsetindikten, onyń jumysy tek qazaq tilinde júrgiziledi. Sondaı-aq atalǵan alańnyń negizinde partııanyń osy baǵytta atqaryp jatqan jumystaryn dáripteý de kózdelip otyr.
Otyrysta sóz alyp, qatysýshylardy Táýelsizdik merekesimen quttyqtaǵan «Nur Otan» partııasy Tóraǵasynyń birinshi orynbasary M.Áshimbaev: «Biz zamanaýı formatta halqymyzdyń rýhanı qundylyqtaryn saqtaý, Táýelsizdigimizdi nyǵaıtý men ulttyq kodymyzdy saqtap qalý sııaqty mańyzdy máselelerdi talqylaý úshin osyndaı jobany qolǵa aldyq. Bul baǵytta «Nur Otan» partııasy kóp jumys istep jatyr. Biz bul máselelerdi talqylap qana qoımaı, naqty nátıje berip jatqan birneshe jobany júzege asyrýdamyz», dep atap ótti.
M.Áshimbaev jastardyń boıynda qundylyqtar júıesi men tarıhı sanany qalyptastyrý qajet ekenine toqtalyp, barlyq qazaqstandyqtardy elimizdiń eń basty merekesi – Táýelsizdik kúnin toılaýǵa óz úlesterin qosýǵa shaqyrdy.
Jalpy alǵanda, birinshi kezdesý jyldyń áleýmettik-ekonomıkalyq jáne qoǵamdyq-saıası qorytyndysyna, sondaı-aq Memleket basshysynyń «Uly dalanyń jeti qyry» maqalasynda baıandalǵan strategııalyq maqsattardy iske asyrý múmkindigine arnaldy. Pikirtalasqa qatysqan Parlament Májilisiniń depýtaty Nurtaı Sabılıanov ózekti máselelerdi qozǵaıtyn osyndaı alańnyń mańyzdylyǵyna toqtaldy. Depýtat qatysýshylardy Táýelsizdikke qol jetkizýdiń mańyzyn jastarǵa tereńirek túsindirýge shaqyrdy. Tarıhshy, saıasattanýshy, «Kıeli Qazaqstan» ǵylymı-zertteý ortalyǵynyń basshysy Berik Ábdiǵalıuly búgingi jastardyń qoǵamdyq qundylyqtan góri jeke bas múddelerine kóbirek kóńil bóletinin aıtty. Ol tarıhı sanany qalyptastyrý, ishki týrızmdi damytý men Qazaqstannyń kıeli jerlerin qasterleýdi úıretý arqyly qalyptasqan ahýaldy ózgertý qajet dep esepteıdi.
Saıasattanýshy Aıdos Sarym tarıhqa ótken kúnderdiń jylnamasy men naqty ataqty tulǵalardyń ómirbaıany arqyly ǵana qaramaı, ony sanany qalyptastyrýdaǵy myqty mehanızmge aınaldyrýdy usyndy. Al Shyńǵys Muqan bolsa, jastar arasyndaǵy mańyzdy ıdeologııalyq aqparattyq jumystardy halyqqa túsinikti, qarapaıym tilde júrgizý kerek ekenin tilge tıek etti. Onyń aıtýynsha, kez kelgen memlekettik múddege jáne ıdeologııaǵa jaýapty qyzmetker mańyzdy máselelerdi durys jetkize bilýi tıis.
Kezdesýge qatysýshylar Memleket basshysynyń «Bolashaqqa baǵdar: rýhanı jańǵyrý» jáne «Uly dalanyń jeti qyry» baǵdarlamalyq maqalalarynyń elimizdi rýhanı jańǵyrtýdaǵy temirqazyq bolatynyn aıtty.
Aıdana ShOTBAIQYZY,
«Egemen Qazaqstan»
