Zeınet jasynda laıyqty tabys alý úshin mindetti zeınetaqy jarnalaryn, onyń ishinde erikti jarnalardy da ýaqtyly jáne tolyq kólemde Qorǵa aýdaryp otyrý qajet. Qazaqstandyqtar erikti jarnalardy óziniń nemese (jumys istemeıtin, tabysy az) týǵan-týystarynyń paıdasyna aýdara alady. Budan basqa, jumys berýshiler de jumyskerlerin jumysqa yntalandyrý úshin olardyń paıdasyna erikti zeınetaqy jarnalaryn (EZJ) aýdara alady.
Qazaqstanda óz qyzmetkerleriniń búgini men bolashaǵyn oılaıtyn kompanııalar kóp emes. Biraq bar. BJZQ mamandary otandyq kompanııalar tarapynan 2017 jyldyń tamyzy men 2018 jyldyń tamyzy aralyǵynda aýdarylǵan erikti zeınetaqy jarnalarynyń kólemine taldaý jasady. Taldaý qorytyndysy boıynsha EZJ tóleýshi-jumys berýshilerdiń tizimi jasalyp, jarnalardyń sanyna qaraı, «BJZQ» AQ tańdaýy boıynsha 2018 jyldyń úzdik jumys berýshisi» baıqaýynyń jeńimpazy anyqtaldy. Ol – «Qazaqtelekom» aksıonerlik qoǵamy.
Qor basshylyǵynyń aıtýynsha, «Qazaqtelekom» AQ – HR-saıasaty (kadrlyq saıasaty) naqty qalyptasqan qazaqstandyq kompanııalardyń biri. Onda qyzmetkerler quramy, olardyń biliktiligi, jumysqa degen yntasy úlken mańyzǵa ıe. Qazaqtelekomnyń ótip bara jatqan jyldyń eń úzdik kompanııasy atanýy – qyzmetkerleriniń búgini men bolashaǵyn qamsyzdandyrýǵa erekshe kóńil bóletin, áleýmettik-jaýapty, adal nıetti, qyzmetkerleri úshin ashyq kompanııa ekendigin bildiredi. О́z kezeginde Qor basshylyǵy qolaıly eńbek jaǵdaılaryn jasaýǵa, eńbek ujymynyń zeınetaqy jınaqtaryn qalyptastyrýǵa umtylatyn kompanııalar sanynyń áli de arta túsetindigine úmit artady.
Saltanatty marapattaý rásimi Almaty qalasynda «Qazaqstan Respýblıkasynyń jınaqtaýshy zeınetaqy júıesine 20 jyl: qorytyndylar, syn-tegeýrinder, damý keleshegi» atty taqyryp aıasyndaǵy dóńgelek ústel barysynda ótti.
Aınash ESALI,
«Egemen Qazaqstan».
ALMATY
