Ipoteka ortalyǵy halyqqa turǵyn úı nesıesi boıynsha barlyq qyzmetti kórsetedi jáne turǵyn úı satyp alýǵa baılanysty barlyq máseleni bir jerde sheshýge múmkindik beredi. Ortalyq «bir tereze» qaǵıdaty boıynsha jumys istep, qujat tapsyrýda klıentterge barlyq jaǵdaı qarastyrylǵan. BI Group holdınginiń basqarma tóraǵasy Amangeldi Omarov:
− Klıentterdiń qajettilikterin qanaǵattandyrýǵa jáne qazirgi zamanǵy tehnologııalarmen birge júrýge umtylatyn kompanııa retinde búgingi tańda adam úshin eń mańyzdy resýrs − ýaqyt ekenin jaqsy túsinemiz. Osy rette, BI Group páter tańdaýdan bastap, tólem sharttaryna deıin árbir klıentke qolaıly bolatyndaı jaǵdaı jasap otyr, – dedi. Onyń aıtýynsha, Astanada ıpotekalyq qaryz berý búginde 2016 jylǵy derektermen salystyrsaq, 3 esege ósken. 2018 jyly holdıngke 10 000-ǵa jýyq klıent júgingen. Bul derekterdi taldap, saraptaı kele kompanııa basshylyǵy elimizdegi qurylys kompanııalary men bankter aldynda ıpoteka máselesi búgingi tańda asa mańyzdy ekenin nazarǵa alǵan.
– Osylaısha, klıentterimizge yńǵaıly bolý úshin BI Finance ıpoteka ortalyǵyn qurý týraly ortaq sheshimge keldik. Osy ortalyqty qurýdyń basty maqsaty − nesıe berý prosesin jeńildetý, klıentke yńǵaıly bolatyndaı jaǵdaı jasaý. BI Group-tan páter tańdaǵannan keıin, klıent BI Finance qyzmetkerimen birlesip, bank nemese memlekettik baǵdarlamalardyń biriniń talaptary men oǵan qolaıly sharttary bar nesıe berý baǵdarlamasyn tańdaıdy. Bizdiń kompanııanyń qyzmetkeri seriktes bankterdiń birinen qaryz alýdyń barlyq prosesinde klıentke qoldaý bildiredi. Ortalyqtyń taǵy bir artyqshylyǵy – ótinimdi jedel qaraý jáne aqshany jedel berý. Buǵan qosa, ótinim berýden bastap ıpotekalyq nesıe alýǵa deıingi ıpotekalyq qaryzdy resimdeý ýaqytyn qysqartý jáne ońaı ári tez sheshýge múmkindik beredi. Bizdiń klıentke saýalnama toltyrý jáne qujattar paketin rásimdeý úshin bank keńselerine qosymsha kelýdiń qajeti joq. Birinshi kredıttik bıýromen (BKB) yntymaqtastyqtyń arqasynda biz ózdigimizshe, klıentterdiń kelisimimen JSN boıynsha BKB derekter bazasymen skorıng ótkizemiz, klıentterdiń bar boryshtyq júktemesi, olardyń kredıttik tarıhy jáne sheshim qabyldaý úshin qajetti ózge de derekter boıynsha aqparat alamyz, – dedi basqarma tóraǵasy. Onyń aıtýynsha, jańa ortalyq túrli ólshemderdegi páterler men úılerdiń san túrin usynyp qana qoımaı, servısti jaqsartý máselelerin de qamtıdy. «Bul jańalyq bizdiń kompanııanyń árbir klıentine artyq kúsh, bos ýaqyt jumsamaı, jeke turǵyn úı ıesi bolýǵa múmkindik beredi dep senemiz», – dedi Amangeldi Omarov.
«Qazaqstannyń turǵyn úı qurylys jınaq banki» AQ Ortalyq fılıalynyń dırektory Jansultan Mataevtyń aıtýynsha, jyljymaıtyn múlikti satyp alý kezinde klıenttiń janynda bolý, ol úshin prosesti barynsha yńǵaıly jáne jaıly etý asa mańyzdy.
– Sondyqtan BI Group kompanııasynyń «BI Finance» ıpoteka ortalyǵyn qurý týraly oıyn qýana qoldadyq. Bul ortalyqqa kelgen qonaq páter tańdap qana qoımaı, qolaıly nesıelendirý sharttaryn belgilep, keńes alyp, menedjerler arqyly nesıege ótinim bere alady. Bul úshin arnaıy ýaqyt bólip, Turǵyn úı qurylys jınaq banki bólimshesine barýdyń qajeti joq. Mundaı jańalyqtyń klıentterimizge unary sózsiz. Onyń ústine olardyń arasynda BI Group kompanııasynan eń ońtaıly sharttarmen úı satyp alǵan adamdar da bar. Bizdiń bank salymshylarǵa jyldyq mólsherlemesi 3,5-8,5% aralyǵyndaǵy zaemdar usynady. Turǵyn úı qurylys jınaq júıesin barlyq adam qoldana alady. Ol kez kelgen tabys deńgeıi bar adamǵa úı alýǵa múmkindik beredi. Eń bastysy aldyńa maqsat qoıyp, Turǵyn úı qurylys jınaq bankinen depozıt ashyp, oǵan turaqty túrde aı saıyn aqsha salyp otyrý kerek. Osy josparmen júrip otyrǵan adam birneshe jyl ishinde baspana ıesi atana alady. Buǵan Turǵyn úı qurylys jınaq banki arqyly úıli bolǵan 170 myń qazaqstandyqtyń mysaly – dálel. Olardyń 35 myńy osy jyly qonys toıyn atap ótti. Budan bólek 1,2 mln salymshy Turǵyn úı qurylys jınaq bankinde aqsha jınap jatyr. Olar jaqyn arada páterli bolýdy josparlaıdy. Bul jolda olarǵa BI Group uıymynyń da qoldaý bildiretinine senimim mol, – dedi J.Mataev.
Jıynda sóz alǵan «Bank SentrKredıt» AQ basqarma tóraǵasynyń orynbasary Tımýr Ishmuratov búginde turǵyn úı naryǵynda ıpotekalyq kredıt berý naryǵynyń sapalyq deńgeıi artyp kele jatqanyn jetkizdi. Onyń aıtýynsha, bul úderis ıpotekalyq qaryzdyń birqatar memlekettik baǵdarlamanyń arqasynda elimizdiń turǵyndarynyń basym bóligine qoljetimdi bola bastaǵandyǵymen tyǵyz baılanysty.
– Biz kámelet jasyna jetken árbir qazaqstandyq azamattyń óz shańyraǵy bolýy qajettigin jaqsy túsinemiz jáne qyzmetimizdiń osy baǵytyna basty kóńil bólemiz. Qazirgi sátte SentrKredıt Banki ıpotekalyq kredıt berýge baılanysty óziniń baǵdarlamalaryn da, memlekettik baǵdarlamalardy da iske asyryp otyr. Árbir ónimge degen ózindik suranys bar. Bizdiń baǵdarlamalarymyzdyń negizgi artyqshylyǵy árbir klıenttiń babyn taýyp, ótinimderdi operatıvti túrde shuǵyl qarastyrý bolyp tabylady. Qaryz alýshynyń qarjylyq jaǵdaıy jetkiliksiz bolǵanda, bank balama sheshimder usyna alady. Buryn bank Qazaqstan ıpotekalyq kompanııasymen birge «Ipoteka Nurly Jer» baǵdarlamasyn sátti iske asyrǵan bolatyn, bul baǵdarlamanyń barlyq kezeńi ishinde SentrKredıt Banki satylymdar kólemi boıynsha kóshbasshy boldy. Aıta ketetin taǵy bir jaıt – qazir Bank tanymal memlekettik «7-20-25» baǵdarlamasyn iske asyryp jatyr. Paıyzdyq mólsherleme tómen, bastapqy jarna qoljetimdi jáne qaryzdy óteý merzimi uzaq bolǵandyqtan, kóptegen qazaqstandyqtar ózderiniń baspana máselelerin sheshý úshin osy baǵdarlamany qarastyrady. Qazirgi sátte SentrKredıt Banki osy baǵdarlamany iske asyrýshy qazaqstandyq ekinshi deńgeıli bankter arasynda sózsiz kóshbasshy atanýda. Biz BI Group ıpotekalyq ortalyǵynyń ashylǵanyn qoldaımyz jáne osy jańa qurylymnyń elimizdegi turǵyn úı máselelerin sheshýge oń yqpal etetinine senemiz. Bizdiń aramyzda burynnan seriktestik qarym-qatynas qalyptasqan, sondyqtan BI Group tobymen yntymaqtastyǵymyz keleshekte de berik ári jemisti bolatynyna senemiz, – dedi T.Ishmuratov.
Jıynda «Qazaqstan Ipotekalyq Kompanııasy «IU» AQ Basqarma tóraǵasynyń orynbasary Májıt Júsipov osydan 1 jarym aı buryn halyqqa jańa «Orda» ıpotekalyq baǵdarlamasy tanystyrylǵanyn tilge tıek etti. Onyń aıtýynsha, bul jobaǵa memleket tarapynan qarajat tartylmaǵan. Naryqqa beıimdelip jasalǵan ıpotekalyq baǵdarlama tabysy turaqty ári jetkilikti qazaqstandyqtarǵa arnalǵan.
– BI Group bizge kompanııanyń klıentterine óz ıpotekasyn usynýǵa múmkindik beredi. «Orda» baǵdarlamasynyń sharttary qaryz somasy jáne kiristerdi rastaý, bastapqy jarnany aýystyrý boıynsha BI Group klıentterine yńǵaıly bolady dep esepteımiz, – dedi M.Júsipov.
Kezdesý barysynda holdıng pen bankter yntymaqtastyq týraly memorandýmǵa qol qoıdy. 2017 jyly Qazaqstanda ıpotekalyq nesıe berý kólemi 355,8 mlrd teńgeni, aǵymdaǵy jyldyń 10 aıynda 410 mlrd teńgeni qurady. 2017 jyly BI Group-tan páterdi ıpotekamen alǵandardyń paıyzdyq kórsetkishi 5,9%, 2018 jyly – 6,8% qurady. 2019 jyly kompanııa jospary boıynsha bul kórsetkish 10-15%-ǵa deıin artýy múmkin. Jańa ıpoteka ortalyǵy 2018 jyldyń 20 jeltoqsanynan bastap Syǵanaq kóshesi 18/3, Viva Plaza bıznes ortalyǵynda jumysyn bastaıdy.
Erkejan AITQAZY,
«Egemen Qazaqstan»
